Во однос на агендата, од ВМРО-ДПМНЕ истакнуваат дека на конгресот на Европската народна партија особен фокус ќе се стави на предизвиците со кои се соочува Европа, инвазијата на Украина, економската и енергетската криза, но и односот кон Западен Балкан и проширувањето и се очекува да се донесе резолуција која ќе повика на итно отпочнување на преговорите со Македонија и Албанија
Делегација на ВМРО-ДПМНЕ предводена од претседателот на партијата Христијан Мицкоски ќе присуствува на тридневна посета во Ротердам, Холандија, по повод учество на 27. конгрес на Европската народна партија, соопштија од партијата.
Конгресот утре започнува со политичкото собрание како вовед во Конгресот, на кое ќе се разгледуваат клучните конгресни документи и резолуции. На конгресот ќе се дискутира за досегашната работа на претседателот и генералниот секретар на ЕПП, како и формално ќе бидат потврдени новите кандидатури за претседател, потпретседатели и благајници на ЕНП.
„Главниот настан започнува во вторник, каде на пленарната сесија свое обраќање ќе има претседателот на ВМРО-ДПМНЕ проф. д-р Христијан Мицкоски, каде што главна тема ќе бидат актуелните состојби во Македонија, корупцијата во редовите на Владата, злоупотребите на власта, економското опустошување, како и барањето за предвремени избори. Вечерта ќе се одржи проширен самит на шефови на држави и влади, како и лидери на опозициски партии“,
се вели во партиското соопштение.
Во однос на агендата, од ВМРО-ДПМНЕ истакнуваат дека на конгресот на Европската народна партија особен фокус ќе се стави на предизвиците со кои се соочува Европа, инвазијата на Украина, економската и енергетската криза, но и односот кон Западен Балкан и проширувањето и се очекува да се донесе Резолуција која ќе повика на итно отпочнување на преговорите со Македонија и Албанија. Главната дебата за политиките на Европските народни партии е на тема „Обединети во солидарноста: одбрана на западната демократија“.
Во делегацијата на ВМРО-ДПМНЕ се потпретседателите Александар Николоски и Тимчо Муцунски, меѓународниот секретар Стефан Андоновски, членот на извршниот комитет и портпарол Марија Митева и членот на извршниот комитет Владимир Ѓорчев.