Мислат дека, ако си постават свои судии и обвинители набрзина, дека сето она кое идната влада на ВМРО-ДПМНЕ ќе го започне тие практично ќе го опструираат во процесот на истраги, судски предмети или, пак, пресуди во конечен случај, вели лидерот на опозициската партија
Амбасадорот на Холандија го потврди она што ние го зборуваме со години наназад. Дека не владее правото, дека е партизирано и октроирано судството, дека се вршат притисоци врз судии, се избираат партиски судии и во Судски совет, а и обвинители се бираат.
Ова го рече лидерот на ВМРО-ДПМНЕ, Христијан Мицкоски, коментирајќи ја изјавата на холандскиот амбасадор на во земјава, Дирк Јан Коп, која ја упатил на средбата со лидерот на Демократската унија за интеграција (ДУИ), Али Ахмети, дека посветеноста на Северна Македонија за членство во ЕУ е загрозена по постојаниот пад во владеењето на правото во земјава, како и дека неприфатливо е несоодветно политичко влијание врз позицијата на претседателот на Врховниот суд.
„Амбасадорот на Холандија го потврди тоа што ние го зборуваме со години наназад, дека не владее правото, дека е партизирано и октроирано судството, се вршат притисоци врз судии, се избираат партиски судии и во Судски совет, обвинители се бираат. Сега повторно имаме таков оглас каде набрзина се прават притисоци да се изберат нови судии и обвинители пред одење за да можат на тој начин овие криминалци во Владата да бидат заштитени или барем така мислат дека, ако си постават свои судии и обвинители набрзина, дека сето она кое идната Влада на ВМРО-ДПМНЕ ќе го започне тие практично ќе го опструираат во процесот на истраги, судски предмети или, пак, пресуди во конечен случај“,
изјави Мицкоски.
Според него, ова е само потврда за сето она што се случува во изминатите повеќе од шест години влада на СДСМ и ДУИ.
„Ова е само потврда дека тоа што се случува изминативе нешто повеќе од 6 години. Владата на СДСМ и ДУИ не само што ја врати години наназад Македонија, туку ќе ни треба време за да ја вратиме во нормален колосек државата, а потоа и да ја развиваме онака како што сакавме да ја видиме оваа држава во раните 90-ти кога стануваше независна“,
заклучи Мицкоски.
Премиерот Димитар Ковачевски денеска на истата тема рече дека доколку кој било бил под притисок од кого било, тоа треба да го каже со име и презиме.
За коментар за падот на владеењето на правото, нешто што го потенцира и амбасадорот Јан Коп, премиерот упати да се прашаат тие што се задолжени за владеењето на правото.
Холандската амбасада вчера информира за средбата меѓу холандскиот амбасадор и лидерот на ДУИ, Али Ахмети.
Од ДУИ, пак, информираа дека владеењето на правото и проверката за сите судии и обвинители биле дел од разговорот меѓу Ахмети и амбасадорот Дирк Јан Коп.
„Законот за ветинг за судиите, обвинителите и политичарите е подолго време во Собранието, но ЕУ првично имаше резерви во овој процес, повикувајќи се на примерот со Република Албанија. Што се однесува до Врховниот суд, Ахмети истакна дека во надлежност на Судскиот совет е да постапува според законите. Според извештаите, до денес имало повеќе дисциплински постапки и во нивна надлежност е да постапуваат согласно законот и без било каков внатрешен или надворешен притисок“,
се вели во соопштението од ДУИ.
Министерот за надворешни работи Бујар Османи денеска на прашањето дали смета дека ваквата порака на Коп била директно насочена кон ДУИ, рече: „Веројатно ДУИ е еден од тие што најмногу зборуваат за борбата против корупција, се разбира дека и ќе се бара поддршка од страна на ДУИ“.