Месеци се во прашање дали изборите ќе се случат есенва или следната година на пролет, порача лидерот на ВМРО-ДПМНЕ, Христијан Мицкоски, на прашањето како ќе дејствува опозицијата откако премиерот Ковачевски повеќепати го одби барањето за предвремени парламентарни избори. Мицкоски денеска рече дека политичкиот фокус ќе им биде кон тоа што ќе работи ВМРО-ДПМНЕ откако ќе замине власта на коалицијата СДСМ-ДУИ, за два, пет или шест месеци.
„Сè додека во парламентот има 61 пратеник кои дигаат рака за да ги поддржат овие криминалци и измамници ние не можеме ништо да сториме. Бројките во парламентот во овој момент не се на наша страна и морам да кажам отворено дека, дали изборите ќе бидат оваа есен или изборите ќе бидат на пролет редовни, месеци се во прашање. Ќе поминат тие месеци и ќе дојдат изборите и тогаш веќе нема бегање, нема криење и нема веќе лажење. Затоа нашиот фокус денеска е исклучиво со пораки кон народот, кон иднината за денот после владата на ДУИ и СДСМ“
рече Мицкоски.
На обвинувањата од власта и претседателот Пендаровски дека земјава може да биде членка на ЕУ пред 2030 година ако опозицијата не го кочи процесот, Мицкоски рече дека станува збор за лаги и манипулации.
„Ако сакаме навистина Македонија да ја придвижиме во ЕУ, прво што треба е час поскоро овие да заминат. Колку побргу заминат, толку побргу Македонија ќе ја придвижиме кон ЕУ. Тие се борат само за да останат ден повеќе, за тендер повеќе, за повеќе украдени народни пари, тие не се борат ниту имаат интерес Македонија да ја видат во ЕУ затоа што таму политички измамници и криминалци од нивниот ков нема“,
порача лидерот на ВМРО-ДПМНЕ.
Во однос на прашањето дали ВМРО-ДПМНЕ ќе ја поддржи предлог-декларацијата по повод 120 години од Илинденското востание и Крушевската Република поднесена од пратеничката група на СДСМ, која во вторник ќе се најде на седница во Собранието, Мицкоски рече дека имаат многу забелешки.
„Ако ја имате прочитано, тогаш знаете дека таа декларација е толку бедно напишана што е навреда за македонскиот народ и за македонската држава и во принцип кога поднесувате таква декларација треба да ја дадете на сите пратенички групи и тие да дадат свои сугестии. ВМРО-ДПМНЕ има своја декларација во рамки на парламентот поднесена за Гоце Делчев, која од страна на владата на ДУИ и СДС беше одбиена“,
додаде Мицкоски.