Мицкоски вели дека за исплата на пензиите заедно со линеарното зголемување ќе се најдат средства затоа што, како што рече, има правилна редистрибуција во Буџетот
Премиерот Христијан Мицкоски во наредениот период се надева дека ќе има можност да седне заедно со претставници на синдикатите за да се види дали има можност за зголемување на минималната плата на 450 евра во првите 100 дена од Владата.
Според Мицкоски, бројките во Буџетот се катастрофални и прашање е како ќе се исплаќа и тоа што е редовно предвидено.
„Тајфун изминал последниве седум години низ државава. И не само што ја ограбил државава туку и жестоко ја уништил. Се обидуваме да биде креативни и да на го почувствуваат тоа граѓаните. Се надевам дека во првите 100 дена ќе имам можност да седнам заедно со синдикатите и со министерот за финансии, за економија и труд, за социјална политика, демографија и млади и да поразговараме и да им ги покажеме бројките за да видат со што се соочуваме“,
рече Мицкоски денеска одговарајќи на новинарски прашања на денешната прес-конференција во Владата.
Тој нагласи дека бројките во Буџетот се катастрофални и додаде дека за исплата на пензиите заедно со линеарното зголемување ќе се најдат средства за исплата затоа што, како што рече, има правилна редистрибуција во Буџетот.
„Недостасуваат 2,5 милијарди денари за редовна исплата на пензиите, настрана од дополнителното линеарно зголемување кое го најавивме и ветивме. Сепак, ние ќе се бориме до последно за се она што е интерес на граѓаните да е и наш интерес и да го реализираме“,
рече Мицкоски.
Околу барањето на синдикатите за зголемување на минималната плата на 450 евра во првите 100 дена од Владата, Мицкоски рече дека ќе седнат на разговори за да ја разгледаат таа можност.
„Ако има можност добро, но ако нема можност очекувам сите заедно да донесеме заклучок како заедно да работиме за да создадеме можност. Токму тоа е начинот на кој треба да функционира оваа Влада – да биде партнер со сите врз основа на можностите или што би рекле повозрасните да си ги пуштиме нозете колку што ни е долга чергата. Ако може да се најдат средства заедно ќе седнеме и ќе разговараме. Секој кој мисли дека има решение нека дојде, јас сакам да го слушнам и да разговарам. Сите решенија се добредојдени. Сите ние сме тука и работиме за доброто на граѓаните и за иднината на нашата заедничка држава“,
додаде Мицкоски.
Инаку, на првата владина седница беше донесена одлука зголемувањето на пензиите од 5 000 денари да се реализира во два наврати, односно првата исплата од 2 500 денари да биде во септември, а втората во истиот износ да следува во март наредната година.
Зголемувањето на пензиите, според информациите од Владата, е овозможено откако е финализирана конструкцијата на овој проект со кој повеќе од 300 илјади македонски пензионери ќе добијат повисоки пензии.