Мицкоски рече дека ако е исплатена државна помош, тоа што тој го направил, сторил огромно кривично дело и злоупотреба на народни пари и ќе одговара за сето тоа
Лидерот на ВМРО-ДПМНЕ, Христијан Мицкоски, вели дека Владата треба да одговори дали е исплатена државна помош за фабриката за електрични возила во Тетово.
„Треба да видиме дали е исплатена државна помош, ги охрабрувам медиумите да ја прашаат Владата, а доколку не одговори, за неколку месеци од денеска идната влада на ВМРО-ДПМНЕ ќе даде одговор на ова прашање“,
рече Мицкоски денеска прашан за коментар за пропаднатата фабрика за електрични возила во Тетово.
Мицкоски рече дека ако е исплатена државна помош, тоа што тој го направил, сторил огромно кривично дело и злоупотреба на народни пари и ќе одговара за сето тоа.
„Ние од самиот почеток предупредувавме дека ова е уште една шарена лага спроти тогаш вонредните локални избори во Општина Тетово, кога имаше повторени избори за советот и во предизборна еуфорија се сликаше целиот државен врв на чело со Ковачевски, Ахмети и останатата група. Сега ги нема да излезат во јавност и да кажат зошто компанијата која така помпезно ја најавуваа банкротираше и дали е исплатена државна помош, а ако е исплатена колкава е таа државна помош за да знаеме колку долго некој ќе одговара затоа што ги злоупотребува народните пари“,
рече Мицкоски.
Дирекцијата за Технолошко-индустриски развојни зони (ТИРЗ) во петокот соопшти дека го запира извршувањето на договорот за доделување државни пари на компанијата која треба да изгради фабрика за еколошки автомобили во Технолошко-индустриската развојна зона во Тетово.
Запирањето на државната помош за компанијата, според соопштението објавено на официјалната веб-страница на Дирекцијата за ТИРЗ, доаѓа откако компанијата мајка во Сојузна Република Германија поднела барање за несолвентност.
Оттаму велат дека и покрај доставените барања од страна на инвеститорот, досега не се доделени никакви средства на компанијата.
Вчера, пак, од ВМРО-ДПМНЕ преку соопштение реагираа на одлуката на Дирекцијата за технолошко-индустриски развојни зони.
„По скоро две години ниту почна изградба на фабриката, ни „С“ од стратешка инвестиција, ни 130, ни 720 милиони евра инвестиција, ниту 890 добро платени работни места, ниту 4 000 индиректни работни места, ниту 30 000 произведени електрични автомобили годишно, ни ефект на снежна топка ни бутур“,
соопштија од ВМРО-ДПМНЕ.
Во соопштението, ВМРО-ДПМНЕ повикаа надлежните институции детално да го истражат случајот со државната помош за „фабриката за електрични автомобили“ во Тетово.
Од Дирекцијата за ТИРЗ остро реагираа на, како што нагласија, наводите за злоупотреба на јавни средства за проектот „е.Го.“. Ниту еден денар јавни пари не се исплатени кон оваа компанија, децидни се од ТИРЗ. Покажавме дека имаме јасни процедури и капацитет да го заштитиме јавниот интерес и средства, додаваат оттаму.
Доколку се утврди дека вакви средства не се исплатени, додаваат од Дирекцијата, очекуваме политичката партија да упати јавно извинување за нарушен углед до сите компании што користат поддршка од државата.