Координаторот на пратеничката група на ВМРО-ДПМНЕ, Никола Мицевски, потсети дека со предлог-законите кои вчера беа поднесени до Собранието се предвидува, како што рече, акцизата за горивата да се преполови и да изнесува пет отсто, наместо актуелните 18 проценти, а прехранбените производи да бидат ослободени од ДДВ до крајот на 2022
Пратеничката група на ВМРО-ДПМНЕ и коалицијата денеска поднесе барање до собранискиот претседател Талат Џафери за закажување итна седница, на чиј дневен ред ќе се најдат поднесените закони од страна на ВМРО-ДПМНЕ, а кои се однесуваат на законски измени за Законот за ДДВ и акцизи.
Координаторот на пратеничката група на ВМРО-ДПМНЕ, Никола Мицевски денеска изјави дека бараат оваа седница да биде свикана што е можно поскоро, оти како што кажа, секоја помината минута откако владата реши да не ги продолжи антикризните мерки за горивата и основните продукти, претставува невидена голгота за граѓаните.
„Нашите граѓани страдаат, доведени се до ситуација да очекуваат некој нешто да преземе, бидејќи со ситуацијата во која владата ги стави можат да преживеат едвај една недела, а не цел месец“,
изјави координаторот на пратеничката група на ВМРО-ДПМНЕ, Никола Мицевски.
Мицевски потсети дека со предлог-законите кои вчера беа поднесени до Собранието, се предвидува акцизата за горивата да се преполови и да изнесува пет отсто, наместо актуелните 18 проценти, а прехранбените производи да бидат ослободени од ДДВ до крајот на 2022г.
„Го повикуваме собраниското раководство веднаш да ја закаже итната седница“,
напомена Мицевски.
Од партијата велат дека со донесување на предлог-законот за нула отсто ДДВ за прехранбените производи и пет отсто ДДВ за горивата до крајот на годинава, ќе се превенира дополнителен раст на цените на основните прехранбени продукти. Затоа, како што велат, бараат колегите пратеници од мнозинството да работат во интерес на граѓаните, а не на владејачката елита.
Инаку, од вчера престанаа да важат претходните антикризни мерки на Владата според кои основните прехранбени продукти – лебот, млекото, јајцата, брашното тип 400, шеќерот и маслото за јадење се продаваа со нула отсто ДДВ, а горивата се продаваа од 18 на 10 отсто ДДВ. Откако истече времетраењето на владината антикризна мерка, од вчера цените на основните прехранбени производи се покачени за два, три, пет, па и дваесет денари, во зависност од производот и од производителот, а горивата се покачија за над девет денари.
Во меѓувреме, владата вчера најави дека со ребалансот на Буџетот ќе биде донесен нов сет антикризни мерки кои ќе бидат потаргетирани, односно ќе бидат насочени кон ранливите категории граѓани и стопанството.
Овој пристап, како што додаваат од Владата, има за цел да ги заштити оние на кои поддршката им е најпотребна и да обезбеди праведна распределба на средствата. Освен тоа, една од целите е, како што велат, да се задржи патот на постепена фискална консолидација – што е од големо значење за задржување на стабилноста на јавниот долг и стабилноста на економијата воопшто.