Појасни дека не е возможно пратениците да ја задолжат Владата да ја промени преговарачката рамка бидејќи таа ја доставува Европската унија.
Имаме предлози за промени во преговарачката рамка што не се возможни, истакна координаторот на пратеничката група на СДСМ, Јован Митревски по координацијата со претседателот на Собранието, Талат Џафери.
Појасни дека не е возможно пратениците да ја задолжат Владата да ја промени преговарачката рамка бидејќи таа ја доставува Европската унија.
„По таа логика би требало ние да ја задолжиме ЕУ да ја промени преговарачката рамка. И во однос на тоа прашање дали ќе продолжат тие разговори еве јавно кажувам дека сме отворени и денес и вечер и утре и кога ќе одлучат пратениците од опозицијата да разговараме за предлог-заклучоците“,
изјави Митревски.
Рече дека материјалите на кои инсистира опозицијата во врска Информацијата за содржината предлог-преговарачката рамка, ќе им бидат дополнително доставени до пратениците преку претседателот Џафери.
„Ако овие материјали не биле достапни, тогаш што сме правеле ние 3-4 часа, врз основа на кои документи сме разговарале. Врз основа на кои документи се создава впечаток или врз основа на кои документи се држат прес-конференции од страна на опозициската партија, така што затоа уште еднаш ова можам да го наречам само политички фолклор“,
истакна координаторот на пратеничката група на СДСМ.
Во однос на тоа дали ќе се одржи нова средба на работната група на собраниските политички партии во врска со предлог-преговарачката рамка, Митревски рече дека идејата на првата средба била да се договорат заклучоци по однос на Информацијата и по завршување на дискусијата по неа, тие заклучоци да бидат предмет на гласање.
Координаторот на пратеничката група на СДСМ вели дека со предлог-заклучоците ќе бидат избиени сите дилеми во јавноста за јазикот, историјата, билатералните прашања, образованието, посебноста на македонскиот народ и идентитетот.
„Сѐ она што ќе го донесеме како заклучок, тоа ќе биде задолжение на Владата како да се однесува во периодот којшто следи. Со тие заклучоци ја обврзуваме Владата дека македонскиот јазик останува и ќе остане секогаш чист за оваа Влада, за следна Влада, за која и да било Влада во следниот период затоа што ова ќе биде процес којшто не почнува и не завршува со чинот на гласање, туку ќе биде процес кој ќе трае во следните години, неколку години“
истакна Митревски.
Во однос на билатералниот протокол со Бугарија, координаторот вели дека таков документ не е потпишан и затоа неговата содржина не е договорена. Рече дека кога тоа ќе се случи, протоколот ќе биде објавен за целата јавност.