Координаторот на пратеничката група на СДСМ, Јован Митревски на прес-конференција истакна дека пратениците од ВМРО-ДПМНЕ се плашеле од вистината и затоа со свирежи со вувузели го саботираа говорот на премиерот Димитар Ковачевски на собраниската говорница.
Според него, опозициските пратеници се нервозни зашто, како што рече, сите нивни лаги, измислици и шпекулации се поразени и потопени.
„Ги видоа заклучоците поддржани од пратениците од владејачкото мнозинство со кои јасна е целосна заштита на јазичните, идентитетските, културните, историски посебности на македонскиот народ и спроведување на процесот на преговори со Европската Унија. Ги слушнаа силните пораки од претседателката на Европската комисија, Урсула фон дер Лајен – Македонци со чист македонски јазик во ЕУ без додавки, модификации, квалификации“,
рече Митревски.
Вели дека во модифицираниот француски предлог билатералните прашања со Бугарија не се ниту услов, ниту дел од преговорите со ЕУ.
„Македонската вистина е една и ниту едни лажни патриоти со вувузели не можат да ја замолчат. Антиевропската коалиција која е против ЕУ толку може. Тензиите и крвавите сценарија кои намерно ги ширеа по улиците и не им успеаа, сакаа да ги пресликаат овде во Собранието.“,
рече Митревски додавајќи дека пратениците од ВМРО-ДПМНЕ биле нервозни зашто ги лажеле граѓаните.
Одговарајќи на новинарско прашање, Митревски рече дека пратениците од владејачкото мнозинство ќе продолжат да зборуваат во Собранието без разлика на сите свирежи од опозицијата. Прашан зошто недостасуваат девет пратеници во собраниската сала, координаторот на пратеничката група на СДСМ кажа дека има пратеници кои отсуствуваат поради вирусот ковид-19.
Претходно, пратениците од опозициската ВМРО-ДПМНЕ со вувузели го саботираа говорот на премиерот Димитар Ковачевски.
Ковачевски се обрати во Собранието, од ВМРО-ДПМНЕ „го надвикаа“ со вувузели (360stepeni.mk)
Пратениците во македонското Собрание денеска нема да гласаат „за“ или „против“ францускиот предлог, односно преговарачката рамка што ја предложи француското претседателство со ЕУ, туку за заклучоци со кои на Владата и се дава насока и се задолжува за што може, а за што не може да преговара во процесот на интеграција во ЕУ.
Врз основа на заклучоците што ќе ги донесе Собранието, а кои во форма на предлог ги соопшти владејачката коалиција, Владата во никој случај не смее да се впушта во преговори со ЕУ доколку тие го засегаат македонскиот јазик, како и идентитетот, историјата и културата на македонскиот народ.