Потпретседателот на ВМРО-ДПМНЕ и пратеник во Собранието, Владо Мисајловски, денеска кажа дека со секое одложување на гласањето на уставните измени, власта на ДУИ и СДСМ само купува време и ја продлабочува кризата во земјата, па затоа, според ВМРО-ДПМНЕ, единствено решение се предвремени избори
Потпретседателот на ВМРО-ДПМНЕ, Владо Мисајловски, вели дека СДСМ ја носи државата, но и себе, во ќор-сокак бидејќи една година лажеле дека ВМРО-ДПМНЕ прафитила уставни измени, за на седницата во петокот да стане јасно дека не само што тие не прифатиле туку и дека има пратеници од владејачкото мнозиство кои не сакаат да гласаат за промени.
Сега, вели тој, ДУИ и СДСМ ќе одат на стратегија на одложување на процесот на гласање до последниот ден на мандатот на оваа влада, бидејќи знаат дека кога и да ги стават на гласање, тие веднаш ќе паднат и нема да има друго решение освен распишување избори.
„Ова е сосема погрешна стратегија, можеби е добра за врвот на власта и бизнисмените блиски до нив кои профитираат од ДУИ и од СДС, но е поразителна за народот и за Македонија. Во периодот до избори ДУИ и СДС нема да направат ништо добро, напротив, ќе продолжат со крадење, а народот ќе биде сè посиромашен. Но, тие забораваат дека додека крадат и вештачки се одржуваат на власт, сè повеќе губат на гласови и наредните избори ќе го доживеат својот најголем пораз”,
вели Мисајловски.
Додека ДУИ и СДС вештачки се одржуваат на власт, Мисајловски вели дека граѓаните трпат бидејќи учебната година повторно ќе започне без книги, болните од ретки болести молат за лекови, пензионерите едвај врзуваат крај со крај, младите се иселуваат, а државата и понатаму се задолжува.
„Време е ДУИ и СДС да ја сфатат сериозноста на ситуацијата, зошто со секој поминат ден со нив на власт, Македонија губи. Со ДУИ и СДС секој ден сме сè подалеку и од ЕУ и од добра иднина. Затоа, потребни се избори, кои се единствено разумно решение за излез од кризата, а сè друго е губење време”,
рече Мисајловски.