Досега визниот договор со Русија беше суспендиран само за одредени лица и компании обвинети дека ја финансираат или поддржуваат војната во Украина и власта на Владимир Путин
Чешкото претседателство со ЕУ информира дека министрите на ЕУ се усогласиле за укинување на визната либерализација за руските граѓани, јави дописничката на МИА од Брисел.
„Европската Унија се согласи за целосна суспензија на договорот за визно олеснување со Русија“,
соопшти Жозеп Борел денеска на прес-конференцијата по неформалниот Гимних во Прага, напиша чешкото претседателство на Твитер.
Од друга страна, пак, високиот претставник за надворешна политика на ЕУ, Жозеп Борел, од Прага порача дека целта на укинувањето на визната либерализација за Русите е да се спречи тие што ја поддржуваат војната во Украина да патуваат за задоволство во Европа.
На прес-конференцијата по неформалниот министерски состанок на ЕУ за надворешни работи, шефот на ЕУ-дипломатијата Борел најави дека е постигнат договор помеѓу 27-те земји членки за да се суспендира целосно договорот за визно олеснување помеѓу ЕУ и Русија.
„Ова значи дека ќе биде потешко да се добие виза за ЕУ, уште ќе биде можно, но значително ќе се намали бројот“,
објасни Борел пред новинарите.
Ова подолго време го бараат земјите во Источна Европа и Балтикот. После повеќе недели преговори со Франција и Германија кои беа против, ЕУ сепак денеска донесе одлука да се укине слободното патување во ЕУ за руските граѓани.
Борел даде повеќе причини за оваа одлука, едната е фактот што е зголемен бројот на преминување на границите на ЕУ, но и дека Унијата сака да ги спречи Русите да патуваат во Европа за задоволство и шопинг.
Досега визниот договор со Русија беше суспендиран само за одредени лица и компании обвинети дека ја финансираат или поддржуваат војната во Украина и власта на Владимир Путин.
„Оваа одлука ќе значи значително намалување на нови визи доделени од земјите членки на ЕУ, ќе биде потешко и подолго да се добие и бројот на нови визи ќе биде значително намален за да се спречи визен шопинг од страна на Руси кои бараат подобри услови“,
рече првиот дипломат на ЕУ.