Се работи за едно лице, кое пред неколку дена пристигнало во земјава од Германија и за 8 лица кои беа во домашна изолација, а имале контакти со 50-годишната жена која беше првиот регистриран случај во земјава
Негативни се резултатите на сите што денеска се тестираа за коронавирус, соопшти Министерството за здравство.
Се работи за лицето, кое на 7 март пристигнало во земјава од Германија, а утрово се пријавило Инфективната клиника со висока температура и како и осум лица поврзани со првата заболена пациентка од Скопје – сопатници во комбето со кое таа допатува од Италија и блиски контакти, кои во изминатите две недели беа во домашна изолација.
Патниците од Струмица што поминале 14 дена во домашна изолација, а пристигнале со првата заболена пациентка на коронавирус ќе бидат тестирани утре.
Попладнево на седница на Владата ќе бидат дискутирани мерките што ги препорача Министерството за здравство по состанокот со Комисијата за заразни болести и Комисијата за следење и информирање за коронавирусот.
Предлозите на Комисијата опфаќаат рестораните и кафулињата да работат со скратено работно време до 18 часот и со преполовен капацитет, односно ќе мора да се задржи растојание од 1,5 до 2 метри меѓу луѓето. Истото важи и за обложувачниците и казината.
Во болниците ќе се примаат на прегледи само итни случаи и ќе има само итни хируршки интервенции.