Пред неколку дена повеќе медиуми објавија дека Никола Пановски и Драган Даниловски, кои се особено присутни во јавноста со свои стручни анализи за време на целата пандемија, ќе бидат нови членови на Комисијата. Но истиот ден Даниловски на Фејсбук, а Пановски за „Фокус“ се огласија дека досега никој не им предложил такво нешто
Промените во Комисијата за заразни болести ќе бидат во насока на проширување и дополнување на нејзиниот состав, со нови, професионални кадри од повеќе области. Во тек се дискусиите, а во таа насока денеска имав состанок со претседателот и секретарот на Комисијата, изјави за МИА министерот за здравство Беким Сали.
„Апсолутно го разбирам интересот на јавноста за натамошните чекори поврзани со составот на ова тело, бидејќи околностите бараат засилено и координирано дејствување врз основа на стручни и реалистични проценки. Во оваа Комисија веќе има доста искусни професионалци во своите области, а натамошните чекори ќе подразбираат надградба, усовршување и професионализација“,
вели Сали за МИА.
Пред неколку дена повеќе медиуми објавија дека Никола Пановски и Драган Даниловски, кои се особено присутни во јавноста со свои стручни анализи за време на целата пандемија, ќе бидат нови членови на Комисијата. Но истиот ден, Даниловски на Фејсбук, а Пановски за „Фокус“ се огласија дека досега никој не им предложил такво нешто.
„Не прифаќам членување во Комисијата за заразни болести“,
објави Даниловски на Фејсбук со објаснување дека Комисијата за заразни болести никогаш не може автономно да функционира, колку и да се трудат членовите така да биде, бидејќи е само советодавно тело на министерот за здравство и тој не би ја жртвувал својата автономност.
„Таа нема ингеренции да носи извршни одлуки, туку само заклучоци, кои му ги предлага на Министерот. Тој може, ама не мора, да ги прифати. Крајната одлука е само негова и би требало да биде извршна. Арно ама, ниту неговите одлуки во тек на пандемијава не се извршни. Треба да поминат на Кризен штаб при Владата – евентуално да се модифицираат (влијание на политика!) – и дури потоа формално да се прифатат од Владата. Во таков амбиент, за мене е неприфатливо да ја жртвувам својата автономија. Останувам со автономен, независен статус како досега – член на универзитетската заедница – и продолжувам да функционирам волонтерски во врска со сѐ што значи стручна помош секому што ќе ми се обрати: Комисијата за заразни болести, Министерството за здравство – но, пред сѐ, граѓаните“,
напиша Даниловски.
За Пановски, пак, не е проблем да биде член на Комисијата, но за тоа има услови – укинување на ковид-сертификатите, за што тој подолго време се залага.
„Можеби, но под мои услови, кои не верувам дека ќе бидат прифатени. Прв услов, укинување на сертификатите“,
изјави Пановски за „Фокус“ на прашањето дали би прифатил да биде член во Комисијата.