Бирото за развој на образованието да ги разгледа сите материјали што се од претходниот период и ако имаат образложенија што со однесуваат на тоа некои материјали да бидат повлечени. Но, и ако има случај каде што има оправдување од страна на Бирото, тогаш треба да ги дадат на јавноста и да знаеме зошто се тие материјали, вели Шаќири
Министерот за образование и наука Јетон Шаќири ќе побара од Бирото за развој на образованието (БРО) внимателно да ги разгледа и сите дополнителни материјали, прашалници, сите одобрувања што ги дава Бирото, за каков било материјал што влегува од невладините организации пред тие да бидат доставени до учениците.
Најавата од Шаќири доаѓа откако вчера на социјалните мрежи имаше реакција на прирачникот „Образование по животни вештини за средните училишта“, а кој потоа беше повлечен од веб-страницата на БРО.
„Не само за тој прашалник туку за сите учебници и други прашалници, покрај ангажирањето на јавноста со забелешки, ќе побарам и од сите советници што се во Бирото за развој на образованието да ги разгледаат сите материјали што се од претходниот период и ако имаат образложенија што со однесуваат на тоа некои материјали да бидат повлечени. Но, и ако има случај каде има оправдување од страна на Бирото тогаш треба да ги дадат на јавноста и да знаеме зошто се тие материјали“,
рече денеска Шаќири одговарајќи на новинарски прашања на свеченото стапување на должност на новоизбраниот ректор на Универзитетот „Св. Кирил и Методиј“, проф. д-р Биљана Ангелова.
На прашањето дали е или не е адекватен прирачникот, Шаќири рече дека досега сè уште го нема погледнато, но откако тоа ќе го направи ќе го даде мислењето до Бирото и тоа како да се постапува понатаму.
Одговарајќи на новинарски прашања во однос на доставата на учебниците, Шаќири го повтори ставот дека економскиот оператор секојдневно доставува учебници.
„Економскиот оператор секојдневно доставува учебници. Завчера се донесоа последните одлуки од Националната комисија и се одобрија учебниците за албански јазик, природни науки, математика за шесто одделение и доколку нема жалбени постапки тие учебници продолжуваат на техничко и графичко регулирање и на печатење. Мислам дека следната недела ќе имаме точни податоци колку е побарано од училиштата, колку е доставено и до крај на септември секој учебник ќе биде доставен до училиште“,
рече Шаќири.