Министерката за одбрана по информативниот хаoс предизвикан од чешката ЕУ аналитичарка: Не барајте сензација, туку вистина

Министерката за одбрана Славјанка Петровска на својот приватен Фејсбук профил реагираше на изјава на чешката ЕУ-аналитичарка, Јана Јузова потенцирајќи дека е неопходно да се проверува вистинитоста на информациите кои се објавуваат и да не се подлегнува на дезиниформации.

„Во борбата со лажните вести првиот чекор е најважен: не барајте сензација, туку вистина. Информирај се точно, пред да пренесеш лажно, освен ако не си дел од ширењето лажни вести. Официјален став на една држава, загриженост, (не) подготвеност пренесува или објавува официјално лице, во нашата земја тоа е амбасадорот. А оваа официјална изјава е повеќе од јасна“,

напиша Петровска реферирајќи се на изјавата на амбасадорот на Чешката Република за „360 степени“.

Направи хаос, па се повлече – чешката аналитичарка сега вели дека нејзината изјава за францускиот предлог не е официјален став на Прага

Јузова завчера беше онлајн учесник на форумот на Институтот за европски политики од Скопје, а во своето обраќање рече дека Чешка и земји-членки се вознемирени поради францускиот предлог за почеток на пристапните преговори со Северна Македонија.

„Според она што го слушнавме од чешкото МНР тие се многу вознемирени од Франција и Бугарија, а причината е што за предлогот не биле консултирани други земји-членки. Била консултирана само Бугарија, а останатите земји биле оставени во темнина“,

рече таа.

Но, Јузова вчера демантираше дека нејзините ставови изнесени на форумот се став на официјална Прага.

„Сакам да разјаснам дека моите коментари беа темелени на моето долгорочно истражување и мислење како аналитичар на политики кој го следи проширувањето на ЕУ и чешката надворешна политика и тие коментари во никој случај не ја претставуваат официјалната политика на Чешка“,

напиша Јузова на „Твитер“.

Амбасадорот на Чешка во земјава, Јарослав Лудва, во изјава за „360 степени“ истакна дека неговата држава, како актуелен претседавач со Советот на ЕУ, е подготвена да придонесе за мазно спроведување на францускиот предлог веднаш штом биде одобрен од Северна Македонија.

Чешкиот амбасадор: Подготвени сме за мазно спроведување на францускиот предлог штом го одобри Скопје

Чешка на 1 јули го презеде ротирачкото шестмесечно претседателство со Советот на ЕУ од Франција. Таа ќе претседава со Унијата до крајот на оваа година.