Според решението Шаќири Марковиќ водела и завршила дисциплинска постапка против вработени во време на изборен процес
До овој момент од ДКСК ништо не е пристигнато, па по тој основ решението за мое разрешување е неосновано и дека во институцијата не е стигната никаква пријава за вршење на мобинг од мене кон вработен, вели Шаќири Марковиќ
Вработените изразија надеж дека нивниот глас ќе се слушне, а во спротивно најавија дека ќе ги искористат сите правни и јавни мерки кои им се на располагање
Нора Шаќири-Марковиќ која изминатите речиси 10 месеци беше в.д. директорка на Театар Комедија денеска е разрешена од функцијата. Тоа е направено со решение на министерката за култура Ирена Стефоска, а како причина се наведува случај со вработен во театарот кој се пожалил на мобинг.
Целиот случај започна минатата недела кога во Театарот дошле инспектори од Државниот инспекторат за труд по пријава за мобинг.
Од Министерството за култура велат дека го добиле извештајот од Државниот инспекторат за труд.
„Во Извештајот е констатирано дека раководното лице презело активности спротивни на член 34 став 1 алинеа 3 од Законот за спречување на корупција и судир на интереси, член 8-а став 1 алиниеа 3 од Изборниот законик и член 11 од Законот за заштита од вознемирување на работно место. Со тоа се потврдува дека раководното лице водело и ја завршило дисциплинската постапка врз вработени во време на изборен процес“,
велат од Министерството, од каде информираат дека нов в.д. директор на НУ Театар „Комедија“ е назначена актерката Магдалена Ризова-Черних.
Но, Шакири Марковиќ на својот Фејсбук профил го кажа својот став за случајот. Вели:
„Како директор поведов дисциплинска постапка за вработен кој без никакво образложение, без слободни денови, по завршувањето на колективниот одмор замина на патување и истото го поткрепи со фотографии и за истото се изјасни пред комисијата која го донесе решението за дисциплинска казна дека е виновен и казната ја прифати. По анонимна пријава за мобинг пратена до заменик на Претседателот на Владата за борба против корупцијата и криминал, одржлив развој и човечки ресурси министерот Љупчо Николовски во театарот дојде вонреден инспекциски надзор односно Државниот инспекторат за труд кој донесе записник во кој се наведува дека ИНСПЕКТОРОТ НА ТРУД НЕ МОЖЕ ДА ДОНЕСЕ ИНСПЕКЦИСКА МЕРКА врз основа на член 22 и 23 од Закон за спречување на корупција и судир на интереси и предметот ќе биде испратен до ДКСК како надлежен орган. Во однос на ова сакам да ве известам дека до овој момент од ДКСК ништо не е пристигнато, па по тој основ решението за мое разрешување е неосновано и дека во институцијата не е стигната никаква пријава за вршење на мобинг од мене кон вработен“,
напиша Шаќири Марковиќ.
На разрешувањето реагираше и колективот. Тие преку видеопорака на Фејсбук, порачаа дека не ја прифаќаат одлуката на Министерството ниту за разрешувањет, ниту за новиот в.д. Тие дури велат ако има разрешување тогаш имаат свој предлог за в.д. директор.
„Шокирани сме од оваа одлука со која се поставува човек кој беше дел од претходната управа која беше разрешена поради неправилности во работењето… Се јавува прашањето: Дали некој со интенција пробува да го сруши Театар Комедија и да го врати во агонијата во која беше пред да се постави Нора Шаќири з в.д. директор. Доколку Министерството за култура смета дека Нора Шаќири не е соодветен кадар за оваа позиција, ние вработените бараме, до распишувањена регуларен конкурс за директор, на позицијата в.д. директор да се постави Дарко Спасов, драматург во Театар Комедија, човек во кој целиот ансамбл има доверба“, порачаа вработените и изразија надеж дека нивниот глас ќе се слушне, а во спротивно најавија дека ќе ги искористат сите правни и јавни мерки кои им се на располагање.
Инаку, Шаќири Марковиќ дојде на в.д. директорката функција, како вработена во Театарот, откако беше разрешен Сашо Ристовски. Кај него беше констатирано дека направил злоупотреба со буџетски средства на театарот од скоро 9 000 000 денари. Во меѓувреме, Театарот имаше две премиери, а во подготовка е трета, организираше два фестивали и потпишан е и Меморандум за соработка со еден од најголемите театри во Киев.