Вицепремиерот и министер за животна средина Изет Меџити, кој е и лидер на Демократското движење, синоќа на партиски настан во Шуто Оризари дал „силно ветување“ дека за една година Владата ќе реализира повеќе вработувања на Албанци во државната и јавната администрација отколку што се направени во двата претходни мандати од другите албански политички субјекти
Меџити да не се однесува како Алиса во земјата на чудата ветувајќи нешто што ниту е реално ниту е возможно без кршење на законските процедури и принципите на доброто управување, реагира министерот за јавна администрација Горан Минчев по изјавата на вицепремиерот Изет Меџити дека за една година ќе вработат илјадници Албанци во државната и јавна администрација.
Според Минчев, изјавата на вицепремиерот е класичен пример на предизборен популизам, без никаква правна или институционална основа.
„Јасно и недвосмислено потенцирам дека сите вработувања во јавниот сектор во моментов се одвиваат исклучиво според потребите на институциите, врз основа на претходно добиени согласности од релевантните институции и во согласност со Законот за вработени во јавниот сектор и Законот за административни службеници. Секое вработување се заснова на принципите на компетентност, стручност и професионална подготвеност на кандидатите, а не на партиски ветувања или политички притисоци“,
се наведува во писмената реакција на министерот за јавна администрација.
Минчев нагласува дека министерството што тој го предводи е цврсто посветено на почитувањето на мерит-системот и,како што нагласи, „тоа значи дека вработувањата и унапредувањата во јавниот сектор мора да се темелат исклучиво на квалитетот и способностите на кандидатите, а не на нивната етничка или политичка припадност“.
Политиката на популистички вработувања не само што би го нарушила интегритетот на администрацијата, додава Минчев во реакцијата, туку и би ги загрозила реформите кои имаат за цел создавање ефикасна, професионална и деполитизирана јавна администрација.
„Јавниот сектор не е предизборен пазар каде што се раздаваат работни места во замена за политичка поддршка. Граѓаните на Република Македонија заслужуваат институции кои работат професионално и транспарентно, а не администрација изградена врз база на популистички ветувања. Затоа, апелирам на одговорност и реален пристап кон јавните политики, а не на нереални ветувања кои служат само за собирање политички поени во пресрет на изборите“,
вели Минчев.
Вицепремиерот и министер за животна средина Изет Меџити, кој е и лидер на Демократското движење, синоќа на партиски настан во Шуто Оризари дал „силно ветување“ дека за една година Владата ќе реализира повеќе вработувања на Албанци во државна и јавна администрација отколку што се направени во двата претходни мандати од другите албански политички субјекти.
„За прашањето на вработувањата, за една година ќе направиме онолку вработувања колку што тие направија за два мандати, осум години во Владата. Значи, ќе бидат стотици, ако не и 2-3 илјади Албанци во државната и јавната администрација и насекаде каде што има потреба од обновување на тие работни места, со што ќе се елиминира една пречка и проблем на нашите граѓани, за да не заминуваат во странство и да не ја гледаат својата перспектива надвор од државата“,
изјавил Меџити.