Пратеникот од опозицијата одговарајќи на новинарско прашање зборуваше и за барањето Бугарите да бидат вклучени во Уставот за што порача дека не треба да се брза со никакви ветувања, како и дека Уставот не е монета за поткусурување. Премиерот Ковачевски, оцени Милошоски, свесно или несвесно прелесно дава ветувања кон Бугарија
За утре во 11:30 часот е закажана седницата на Комисијата за надворешна политика во Собранието на која се очекува шефот на дипломатијата Бујар Османи пред пратениците да реферира за тоа какви одговори земјава испратила до Бугарија за нивните „5+1“ барања. Претседателот на ова собраниско тело, Антонијо Милошоски, очекува министерот да се појави на седницата и да има интересна дебата во која ќе се дадат посериозни одговори околу преговорите со Софија.
„Очекуваме присуство на министерот за надворешни работи од кого побаравме да ги презентира во писмена форма одговорите коишто Македонија во декември минатата година ги дала до официјална Софија на нивниот т.н. план ’5+1‘, за да бидеме запознаени како пратеници за што се работи и дали таквите одговори се совпаѓаат и се во рамките на усвоената Декларација од македонското Собрание каде утврдивме заеднички национални позиции. Се надевам дека присуството ќе биде потврдено на утрешната собраниска комисија и очекувам да имаме интересна, занимлива, расправа на којашто очекувам да добиеме посериозни одговори околу процесот кој досега е обвиен со една доза на сомнеж за тоа колку транспарентно се преговара на релација Скопје – Софија“,
изјави Милошоски.
Пратеникот од опозицијата одговарајќи на новинарско прашање зборуваше и за барањето Бугарите да бидат вклучени во Уставот за што порача дека не треба да се брза со никакви ветувања, како и дека Уставот не е монета за поткусурување.
„ВМРО-ДПМНЕ не смета дека Уставот треба да биде монета за поткусурување во секое политичко недоразбирање со кој било од соседите и сметаме дека по тоа прашање треба да бидеме поконвенционални, да размислиме посериозно и да не брзаме со какви било ветувања коишто гледаме дека премиерот Ковачевски многу прелесно ги дава, а со тоа можеби свесно или несвесно не разбира дека ги нарушува преговарачките позиции на Македонија“,
рече Милошоски.
Пратеникот кој е на чело на Комисијата за надворешни работи во вторникот испрати писмо до Османи за да дојде на седница и да реферира во однос на одговорите за планот „5+1“ давајќи му можност да одбере кога тој може во периодот од 26 јануари до 15 февруари. Османи, пак, уште истиот ден потврди дека ќе дојде на седница на Комисијата на 28 јануари.