На прашање на „360 степени“ до каде е постапката со идните амбасадори на земјава во неколку мисии, кои треба уште да ги одбранат тезите пред собраниската Комисија за надворешни работи, Милошоски вели дека ќе закаже продолжение на оваа седница откако Османи ќе ја исполни својата законска обврска – да реферира пред пратениците за преговорите со Бугарија во оваа фаза
Антонијо Милошоски од ВМРО-ДПМНЕ, како претседател на собраниската Комисија за избори и именувања денеска го повика повторно шефот на дипломатијата Бујар Османи да дојде во Собранието и пред пратениците да соопшти за што преговара со Софија.
Во врска со изјава на Османи дека вратите на МНР се отворени за лидерот на опозицијата Христијан Мицкоски, Милошоски рече дека шефот на дипломатијата може да го повика Заев во Министерството, бидејќи, како што рече, СДСМ ѝ седи во скут на ДУИ во овој момент.
„Според закон, министерот Бујар Османи е обврзан да дојде пред Собранието и Комисијата за надворешна политика и тука да даде отчет за што се преговара. Ако се сеќавате пред неколку месеци, Владата усвои заклучок, кога се крена поголем врева околу бугарските оспорувања, дека ќе го извести Собранието за наводните можни нацрт-анекси, но до ден-денес гледаме дека тие го избегнуваат тоа. Ја користам оваа прес конференција како апел и барање, согласно Законот за надворешни работи и Законот за избор на Влада, министерот Османи да дојде, бидејќи има законска обврска пред Собранието да даде отчет за тајните преговори што Заев и Бучковски деновиве ги водат со официјална Софија“,
рече Милошоски.
На прашање на „360 степени“ до каде е постапката со идните амбасадори на земјава во неколку мисии, кои треба уште да ги одбранат тезите пред собраниската Комисија за надворешни работи, Милошоски вели дека ќе закаже продолжение на оваа седница откако Османи ќе ја исполни својата законска обврска – да реферира пред пратениците за преговорите со Бугарија во оваа фаза.
Пред неколку месеци, Османи испрати и писмено барање до Милошоски да не го кочи испраќањето на амбасадорите кои веќе ги минале сите постапки и добиле согласност/агремани од земјите за упатување.