На прашање на „360 степени“ за коментар за содржината на разговорите, пратеникот на ВМРО-ДПМНЕ кусо посочува дека за тоа треба да се праша Заев
Пратеникот на ВМРО-ДПМНЕ Антонио Милошоски обвини дека лидерот на СДСМ Зоран Заев нарачал објавување на новите снимки од прислушувани разговори во кои се слуша како тој разговара со судии за случај поврзан со Здружението на возачи – Кичево.
Во реакцијата преку фејсбук, Милошоски не ја коментира содржината на снимките кои упатуваат на обид за негово влијание врз судии за случајот кој се однесува на неговиот татко. На прашање на „360 степени“ за коментар за содржината на разговорите, Милошоски кусо посочува дека за тоа треба да се праша Заев.
„Ќе Ве отворам како пупка“
Новите „бомби“ беа објавени денеска на Јутјуб каналот на ГолиТру. Милошоски вели дека се објавени пет од шест негови снимки, нелегално направени од УБК во 2011 година, односно, како што посочува, во времето на Сашо Мијалков.
„Го знам лицето кое нелегално ги поседува копиите од сите снимки од СЈО, лично ја координира селекцијата и ја нарачува нивната објава. Тоа е лицето З.З., оној кој лажно тврдеше дека ги предал сите снимки на СЈО и дека не поседува копии од истите. Господине З.З., со објавата на овие снимки докажавте дека без нив Вие не сте можеле да уценувате пратеници, да рекетирате стопанственици, да заплашувате сопственици на медиуми и да бидете и обвинител, и премиер, и судија истовремено. Изгледа силно Ве здоболе објавата на двата материјали за вашите незаконитости, кои ми беа доставени од укажувач. И во право сте, допрва ќе ве боли. Како дојдовте, така ќе си одите! Укажувачите ќе стануваат се побројни и се посмели, а јас уште помотивиран и во служба на јавниот интерес. Ќе Ве отворам како пупка! Се слушаме наскоро #ТикТак“,
напиша Милопоски на фејсбук.
Минатиот месец, Милошоски, од собраниската говорница, пушти една аудиоснимка и презентираше транскрипт за, како што наведе, разговор на Заев во врска со првообвинетиот во случајот „Рекет“ Бојан Јовановски – Боки 13. Неколку дена подоцна, тој сакаше да пушти уште една бомба, ама беше спречен од спикерот Талат Џафери. Овие снимки тој потоа ги предаде во Обвинителството за организиран криминал.
На протестот на ВМРО-ДПМНЕ пред десетина дена пред судската палата во Скопје дел од сценариото беше пуштање на третата снимка што ја објави Милошоски од партиското седиште. За оваа снимка, Милошоски рече дека е очигледно дека станува збор за гласот на Заeв, кој, како што посочи, договарал судски одлуки. Заев зборува и за разрешениот претседател на Врховниот суд -Вангеловски. И оваа аудио-снимка заврши кај обвинителката Вилма Русковска.
Случајот „Моќник“
Милошоски беше еден од главните преговарачи на ВМРО-ДПМНЕ, на политичко ниво, за Законот за јавно обвинителство. Тоа наидуваше на реакции од СДСМ, со оглед на тоа што пратеникот на ВМРО-ДПМНЕ и поранешен шеф на дипломатијата е еден од партиските функционери кои се опфатени со истраги што ги отвори СЈО. Милошоски е опфатен со случајот „Моќник“, за кој истрагата беше отворена по критичниот датум за СЈО, односно по 30 јуни 2017 година.
Дел од медиумите информираа деновиве дека истрагата за „Моќник“ е завршена и дека се очекува наскоро да биде поднесено обвинение. Случајот го води обвинителката Фатиме Фетаи.
СЈО го сомничеше Милошоски дека под негово влијание се распродавал имот на државата и општински имот. Во случајот се спомнуваше и таткото на Милошоски, кој, наводно, ја купил зградата во која билe сместенi администрацијата и градоначалникот на општина Пласница и две месни канцеларии, кои воопшто не биле во сопственост на Македонски Брод, туку на име на државата. Од СЈО посочуваа и дека Милошоски, сметајќи дека еден судија од Кичево е близок со градоначалникот на Пласница, го поттикнал претседателот на Комисијата за лустрација Томе Аџиев, кој исто така е осомничен во предметот, да го лустрира судијата, за да му престане функцијата.