Милевски, како што вчера изјави за МИА, се повлекува од лични причини, а за новиот министер рече дека нема да биде од редовите на пратениците
Министерот за локална самоуправа од Либерално-демократската партија, Горан Милевски денеска се очекува да ја депонира својата оставка до Владата.
Милевски, како што вчера изјави за МИА, се повлекува од лични причини, а до крајот на неделата се очекува неговата партија да предложи нов кандидат за министер.
Новиот министер, според Милевски, нема да биде од редовите на пратениците.
Минатата недела Милевски потврди дека ќе се повлече од министерската функција, а во изјава за „Локално“ изјавил дека после тригодишно извршување на функцијата министер за локална самоуправа, време е за промени и на ова место да дојде друг кадар од ЛДП.
,,Фокус“ претходно објави дека Милевски се повлекува – прво од министерската функција, додека партиската, според наведеното, ќе ја извршува до следниот редовен конгрес што треба да се одржи до крајот на годинава.
Неофицијално, според ,,Фокус“, најсериозен кандидат за нов лидер на либералдемократите е потпретседателката Моника Зајкова, која е еден од двајцата пратеници на ЛДП. Во конкуренција за нов министер од редовите на ЛДП, пак, според ,,Фокус“ се двајца кандидати, меѓу кои е и поранешниот лидер и градоначалник на Скопје, Ристо Пенов.
Милевски e член на Либерално-демократската партија од 1995 година. Од 2015 година ја извршува функцијата претседател на ЛДП. За министер за локална самоуправа е избран на 27 јуни 2019 година.