Мерц во изјавата вели дека ако украинскиот претседател Володимир Зеленски сака да го соопшти ова на своето население и да добие мнозинство за тоа, а треба да одржи референдум, тогаш во исто време мора да им каже на луѓето дека им го отворил патот кон Европа
Германскиот канцелар Фридрих Мерц сугерира дека Украина можеби ќе мора да прифати дека делови од нејзината територија би можеле да останат надвор од контролата на Киев во иден мировен договор со Русија, поврзувајќи ги таквите отстапки со изгледите на земјата за приклучување кон Европската Унија, пишува Ројтерс.
„Во одреден момент, Украина ќе потпише договор за прекин на огнот, во одреден момент, се надеваме, мировен договор со Русија. Потоа можеби дел од територијата на Украина повеќе нема да биде украинска“,
им рече денеска Мерц на учениците во гимназијата „Каролус-Магнус“ во Марсберг, град во Северна Рајна-Вестфалија.
Мерц во изјавата вели дека ако украинскиот претседател Володимир Зеленски сака да го соопшти ова на своето население и да добие мнозинство за тоа, а треба да одржи референдум, тогаш во исто време мора да им каже на луѓето дека им го отворил патот кон Европа.
Напредокот на пристапувањето на Киев во ЕУ беше блокиран од унгарскиот премиер Виктор Орбан, но неговиот пораз на изборите претходно овој месец ги зголеми надежите дека може да се премине на следниот чекор. Украина моментално има статус на официјален кандидат за ЕУ.
Мерц предупреди да не се зголемуваат надежите за брз пристап, велејќи дека Украина не може да се приклучи на блокот додека е во војна и прво мора да исполни строги критериуми, вклучително и оние во врска со владеењето на правото и борбата против корупцијата.
„Зеленски имаше идеја да се приклучи на ЕУ на 1 јануари 2027 година. Тоа нема да функционира. Дури и 1 јануари 2028 година не е реалистично“,
вели Мерц.
Тој предложи средни чекори како што се улогите на набљудувачи за Украина во институциите на ЕУ, за кои рече дека наидоа на широко одобрување меѓу европските лидери на нивниот самит минатата недела во Кипар, на кој присуствуваше Зеленски.
Мерц тогаш изјави дека предложил претпристапен процес за Украина што ќе ја доближи земјата до Европската Унија (ЕУ) и додаде дека сличен процес би можел да следи и во однос на пристапувањето кон Унијата на земјите од Западен Балкан.
Во изјавата дадена за новинарите на вториот ден од неформалниот состанок на лидерите на земјите членки на ЕУ што се одржува во Кипар, Мерц наведува дека претпристапниот процес на Украина би вклучувал, на пример, учество на земјата во Европскиот совет, Европскиот парламент или Европската комисија (ЕК), но без право на глас.
Овој процес, како што додава тој, би бил еден вид стратегија, чија крајна цел треба да биде полноправно членство на Украина во Европската Унија.
Европската Унија минатата недела одобри заем од 90 милијарди евра за Украина, со кој ќе се покријат поголемиот дел од нејзините потреби до 2027 година, но блокот останува поделен околу темпото на преговорите за пристапување.