Образложувајќи ја програмата на германското претседателство со ЕУ пред Европскиот парламент, канцеларката рече дека Германија, како претседавач со ЕУ, до крајот на годинава има задача да ги поттикне преговорите за членство со Северна Македонија и „во краен случај и со Албанија“
Германската канцеларка Ангела Меркел денеска во Европскиот парламент ја образложи програмата на германското претседателство со ЕУ, истакнувајќи дека „треба да се стреми кон напредок на земјите од Западен Балкан и да им се даде перспектива за членство во Унијата“.
Како што пренесува МИА. Меркел нагласи дека Германија, како претседавач со ЕУ, до крајот на годинава има задача да ги поттикне преговорите за членство со Северна Македонија и „во краен случај и со Албанија“, додавајќи дека е важно и партнерството со Африка, особено кога станува збор за притисокот на мигрантите.
Меркел изјави дека ЕУ мора да дејствува одлучно и солидарно, помагајќи им најмногу на оние земји кои се најтешко погодени од последиците на пандемијата на новиот коронавирус, потенцирајќи ја важноста од усвојување на големиот финансиски план за поддршка од 750 милијарди евра, за кој многу придонеле Германија, Франција и ЕК.
Во почетокот на овој месец, Европската комисија ја утврди предлог-преговарачката рамка за нашата земја, при што домашните полиички фактори нагласија дека е посебно значајно што тоа се случи на првиот ден од германското претседателство со ЕУ.