Шефот на Меѓународна агенција за атомска енергија вели дека тимови на Агенцијата треба да заминат во Запорожје, како и во Чернобил, за да ги утврдат фактите за тоа што всушност се случува таму, да извршат поправки и инспекции и да спречат да се случи нуклеарна несреќа
Најголемата европска нуклеарна централа, која се наоѓа во Украина, е „целосно надвор од контрола“ и Русија и Украина мора итно да дозволат експерти да го посетат комплексот со цел да се стабилизира ситуацијата и да се избегне нуклеарна катастрофа, изјави денеска генералниот директор на Меѓународната агенција за атомска енергија. (МААЕ), Рафаел Гроси.
Гроси рече дека ситуацијата станува сè поопасна со секој ден во централата во Запорожје, која руските војници ја зазедоа на почетокот на март, веднаш по почетокот на инвазијата на Украина.
„Во електраната беше прекршен секој принцип на нуклеарна безбедност. Она што е во прашање е исклучително сериозно и опасно“,
рече Гроси
Има „парадоксална ситуација“ бидејќи централата е контролирана од Русија, но украинскиот персонал продолжува да ги извршува работните задачи, што доведува до неизбежни тензии и конфликти, рече тој.
Гроси додаде дека иако МААЕ има одредени контакти со персоналот на нуклеарната централа, тие се „нецелосни и многу вознемирувачки“. Тој додаде дека е прекинат синџирот за набавка на опрема и резервни делови и дека не е сигурен дека централата добива сè што ѝ е потребно.
„МААЕ, исто така, треба да изврши многу важни инспекции за да се осигури дека нуклеарниот материјал е заштитен, има многу нуклеарен материјал таму што треба да се провери“,
рече тој.
Гроси вели дека МААЕ треба да замине во Запорожје, како и во Чернобил, за да ги утврди фактите за тоа што всушност се случува таму, да изврши поправки и инспекции и да спречи да се случи нуклеарна несреќа.