Тој додаде дека целите на „специјалната воена операција“ ќе бидат остварени, а на прашањето како го оценува нејзиниот напредок, тој одговори дека тоа е сложено прашање
Поранешниот руски претседател и премиер Дмитриј Медведев денеска изјави дека светот веројатно е на работ на нова светска војна и дека ризиците од нуклеарен конфликт растат.
„Светот е болен и многу веројатно е на работ на нова светска војна“,
рече Медведев на конференција во Москва.
Тој моментално ја извршува функцијата заменик-претседател на моќниот Совет за безбедност на Путин.
Тој рече дека таквата нова светска војна не е неизбежна, но дека ризиците од нуклеарен конфликт се зголемуваат и се посериозни од загриженоста за климатските промени.
Тој додаде дека целите на „специјалната воена операција“ ќе бидат остварени, а на прашањето како го оценува нејзиниот напредок, тој одговори дека тоа е сложено прашање.
„Можам само да кажам дека сум апсолутно убеден дека ќе се постигнат сите цели што претседателот ги постави пред нашите војници за извршување на специјална воена операција. Денес не се соочуваме со украинската армија, туку со целата организација на Северноатлантскиот договор и ова е навистина необјавена или специјална прокси-војна, како што понекогаш се нарекува, што западниот свет ја води против нашата земја. Затоа мораме да се бориме со целото НАТО земајќи ја предвид испораката на оружје и, искрено да речеме, обуката на украинскиот воен персонал и многу други фактори“,
рече Медведев.
Специјалната воена операција е нашиот одговор на бескрајното проширување на НАТО, додаде тој.
„И јас и моите соборци и колеги имавме некои илузии во 1990-тите дека ќе почнеме да живееме во хармонија со Европејците и САД и дека повеќе нема да бидеме непријатели и дека повеќе нема да се судриме. Сепак, сето тоа се распадна“,
рече Медведев.