Реакцијата на партијата, чиј член до пред помалку од една година беше и самиот Изет Меџити, следува откако тој во интервју за ТВ 21 кажа дека додека бил градоначалник на Општина Чаир ја легализирал куќата на актуелниот министер за надворешни работи Бујар Османи оти имала статус на дивоградба. Истото го сторил и со објект на вицепремиерот Артан Груби, на други граѓани и функционери на ДУИ
Изет Меџити синоќа со своја уста го призна она што сите го знаат и она што медиумите го објавија, а тоа е дека тој самиот одлучувал за легализација на бесправно изградени објекти во Општина Чаир, а не законот.
Ваква е реакцијата на Демократската унија за интеграција (ДУИ) на изјавата на поранешниот прв човек на Чаир од редовите на оваа партија, Изет Меџити, кој сега е дел од коалицијата на опозициските партии на Албанците.
Меџити во синоќешното гостување на ТВ 21, меѓу другото, кажа дека додека бил градоначалник на Општина Чаир ја легализирал куќата на актуелниот министер за надворешни работи Бујар Османи оти имала статус на дивоградба. Истото го сторил и со објект на вицепремиерот Артан Груби, на други граѓани и функционери на ДУИ.
Во писмената реакција на изјавата на Меџити, од ДУИ прашуваат зошто доколку знаел дека се крши законот, тој решил да ги потпише актите за легализација на споменатите објекти заедно со, како што додаваат, над 30 колективни згради изградени по 2011 година и притоа не ги презел потребните дејствија за нивно уривање.
„Демократската унија за интеграција најостро го осудува неговиот обид да избега од одговорноста за сторениот криминал со легализацијата на објектите и зградите во Чаир, префрлувајќи ја вината на апсурден начин и без правна основа врз граѓаните на Чаир. Изет Меџити јавно на телевизија призна дека одлуките за легализација на објекти или згради ги носел тој сам како градоначалник и со политички/коруптивни преференции, а не строго како што предвидуваат законските и подзаконските одредби“,
велат од партијата чиј член до пред помалку од една година беше и самиот Меџити.
Дополнително, ДУИ ги повика правосудните органи на постапување за ова, како што велат, флагрантно признание на одговорноста додавајќи оти никој не треба да биде над законот и да се соочи со одговорноста.
Изет Меџити, кој пред помалку од една година ја напушти партијата на Али Ахмети, беше градоначалник на Општина Чаир од редовите на ДУИ во периодот од 2005 до 2017 година.
Во октомври минатата година тој во интервју за „360 степени“, меѓу другото, беше прашан дали во Чаир се гради без одобрение и дали се легализираат тие дивоградби со тоа што ќе се заведуваат под стари архивски броеви. Меџити на прашањето одговори со:
„Во однос на дивоградбите, на ниво на Република Македонија има над 500 илјади и ако го додадеме и бројот на жители, тогаш излегува дека секое семејство е инволвирано во дивоградбите. Дивоградбите биле и во времето кога биле во надлежност на Министерството за транспорт и врски, а не на општините и потоа продолжиле. Фактички ви објаснувам дека затоа на ниво на Македонија неколкупати е донесен закон за легализација. Да немаше дивоградби од Струмица до Струга, немаше да има потреба да се донесе закон за легализација. Граѓаните во Чаир не направиле ништо повеќе од тоа што го направиле на ниво на Скопје и на ниво на Македонија.“
Меџити се соочи со ова прашање откако „360 степени“ претходно објави оти висококатници во Чаир, кои биле изградени во последните две-три години, се легализирани како да постоеле во март 2011 година кога, според Законот за постапување со бесправно изградени објекти, легализација е можна само за објектите изградени до тој момент.
Повеќе за истражувањето на „360 степени“:
- (ВИДЕО) „Временска машина“ во Чаир: Висококатници изградени последниве две-три години, легализирани како да постоеле во 2011 г.
- (ВИДЕО) Во Чаир архивирале барања за легализација уште пред дивоградбите да почнат да се градат
- (ВИДЕО) Ако има неправилности, ќе одговараме, вели Висар Ганиу за предметот на ЈО за спорните легализации во Чаир