По двете номинации за „Оскар“ и серијата високи филмски признанија за документарецот „Медена земја“, Владата денеска донесе серија заклучоци со кои ги задолжува министерствата „координирано да придонесат за афирмација на филмот“. Петчлената екипа составена од режисерите Љубомир Стефанов и Тамара Котевска, кинематограферите Фејми Даут и Самир Љума, како и продуцентот и монтажер на филмот Атанас Георгиев, ќе добие државна награда, а протагонистите од филмот, Атиџе Муратова и многудетното семејство на Хусеин Сам од Бекирлија – социјална заштита.
„Владата го задолжи Министерството за труд и социјална политика да ги преземе сите потребни активности со кои ќе обезбеди материјална помош и домување за Атиџе Муратова и осумчленото семејство што учествуваше во филмот. Министерството за култура има задолжение да обезбеди државна награда соодветна за достигнувањето на петчлената екипа која го сними филмот, која треба да предвиди признание за успехот и месечен материјален надомест. Министерството за животна средина и просторно планирање да организира серија едукативни настани за темите што ги отвора филмот, а Министерството за култура, во соработка со Министерството за образование и наука, да организираат емитувања на филмот ‘Медена земја’ за сите средни училишта во земјата, на универзитетите и во домовите на култура, за широка афирмација на големите и благородни пораки што ги пренесува филмот“, пишува во владиното соопштение.
Како што информираат од Владата, канцеларијата на премиерот презема обврска, во соработка со продуцентите на филмот, да организира бесплатно емитување за граѓаните во кината, како и заедничко гледање на филмот со децата од малите групни домови и лицата од социјален ризик. Државата ќе ги покрие и патните трошоци околу патувањето на петчлената филмска екипа и протагонистката на доделувањето на „Оскарите“, закажано за 9 февруари во Холивуд.
„Медена земја“ е најнаградуван македонски документарен филм. Приказната е за последната одгледувачка на диви пчели во Европа, Атиџе Муратова, која се соочува со предизвици откако во нејзиниот крај пристигнуваат пчелари номади кои го прекршуваат основното правило: земи половина од медот, а другата половина остави им ја на пчелите.
Филмот е сниман во речиси недопрената дивина на Овчеполието, во и околу селото Бекирлија.
*поврзана вест: (ВИДЕО) Од Бекирлија до Холивуд – како се снимаше „Медена земја“