Најголем дел од ова е поврзано со Тесла, чии акции паднаа за 65 отсто во 2022 година. Побарувачката за „Тесла“ опадна откако минатата година се зголеми конкуренцијата во електрични возила од етаблираните производители на автомобили
Извршниот директор на Тесла, Спејс икс и Твитер вреди 137 милијарди долари според индексот на милијардери на Блумберг, што е доволно за да се најде на второто место на листата на најбогати луѓе во светот, веднаш зад претседателот на ЛВМХ, Бернард Арно. Но, пред нешто повеќе од еден месец тој беше на првото место, а тогаш неговата нето вредност беше 340 милијарди долари. Овој податок го прави Маск првиот човек во историјата што изгубил 200 милијарди долари, објави Блумберг.
Најголем дел од ова е поврзано со Тесла, чии акции паднаа за 65 отсто во 2022 година. Побарувачката за „Тесла“ опадна откако минатата година се зголеми конкуренцијата во електрични возила од етаблираните производители на автомобили. Компанијата ги пропушти целите за раст и го намали производството во Кина, а нејзините испораки во четвртиот квартал, објавени во понеделникот, не ги исполнија проценките на Волстрит.
Падот на интересот на клиентите за „Тесла“ стана очигледен минатиот месец, кога компанијата им го понуди на клиентите најголемиот попуст досега. Со цел да се ослободи од инвентарот пред почетокот на новата година, компанијата на крајот понудила попуст од 7 500 долари за оние што ќе го земат возилото пред крајот на годината. Овие големи попусти ги вознемирија инвеститорите, со што акциите на „Тесла“ паднаа за 37 отсто во декември.
Критичарите долго време се прашуваа дали „Тесла“ некогаш вредела билиони долари на кои компанијата беше проценета на почетокот на 2022 година. На својот врв, „Тесла“ вредеше повеќе од 12-те најголеми светски производители на автомобили заедно, иако имаше само мал дел од нивната продажба.
„Тесла“ ја заврши годината со вредност од 386 милијарди долари, што е сепак многу повисока од нејзината конкуренција, но многу помалку од технолошките титани како Епл, Мајкрософт, Гугл и Амазон во споредба со пред една година.
Купувањето на Твитер од 44 милијарди долари од Маск исто така не им помогна на акциите на „Тесла“, ниту на неговото лично богатство. Откако го објави својот интерес за Твитер минатиот април, Маск продаде акции на „Тесла“ во вредност од 23 милијарди долари.
Постојаното „твитање“ и непредвидливото однесување на Маск, особено по преземањето на функцијата извршен директор на Твитер, ги потресе инвеститорите на „Тесла“, со оглед на тоа што тие очекуваа поголема посветеност на највредната компанија. Маск се бранеше од ваквите критики со тврдењето дека не пропуштил ниту еден голем состанок на „Тесла“ откако го презеде Твитер.
Си-ен-ен предвидува дека акциите на „Тесла“ би можеле да закрепнат и Маск повторно да стане најбогатиот човек на светот. Но, неговата репутација како гениј претрпе сериозна штета, речиси колку и неговото лично богатство.