„Премиерот предупреди и дека неговото прекршување или селективното почитување (на Преспанскиот договор н.з.) не само што го поткопува кредибилитетот на сите напори за решавање на отворените прашања во Западен Балкан, туку и ја загрозува безбедноста во поширокиот регион“, изјави денеска портпаролот на грчката влада
Европскиот пат на Северна Македонија поминува низ Грција и очигледно, ако земјата не го смени начинот на кој ги третира меѓународните договори нема да оди напред – порача денеска портпаролот на грчката влада, Павлос Маринакис, посочувајќи го она што и грчкиот премиер Киријакос Мицотакис го кажа на самитот на НАТО, оти целосната имплементација на Договорот од Преспа е неопходна за Алијансата и за Западен Балкан.
„Мицотакис предупреди и дека неговото прекршување или селективното почитување не само што го поткопува кредибилитетот на сите напори за решавање на отворените прашања во Западен Балкан, туку и ја загрозува безбедноста во поширокиот регион“,
рече портпаролот на грчката влада и додаде дека Мицотакис во неговото обраќање посочил и дека договорите мора да се почитуваат.
Владиниот портпарол потсети дека Нова демократија, од чии редови е премиерот Киријакос Мицотакис, не гласаше за Договорот од Преспа, бидејќи, како што рече, содржи пропусти во заштитните мерки и одредбите.
„Позиција која, денес всушност е оправдана. Затоа и не ги ратификувавме протоколите што произлегуваат од Договорот, ниту ќе го сториме тоа, доколку соседната земја не се усогласи со обврските што ги презеде. Сепак, очигледно е дека напредокот, безбедноста и просперитетот се засноваат на почитување на меѓународното право и меѓународните договори. И сè додека нашите соседи не го сфатат тоа, нивната европска перспектива ќе остане затворена“,
рече Маринакис на денешната прес-конференција.
И покрај тоа што и двајцата учествуваа, премиерите на С Македонија и на Грција, Христијан Мицкоски и Киријакос Мицотакис, не остварија средба на маргините на самитот на НАТО во Вашингтон, кој завршува денеска.