Одговарајќи на новинарско прашање за случувањата во Алијанса за Албанците и барањата од партијата за разрешување на актуелните министри за информатичко општество и администрација и за здравство, првиот вицепремиер попладнево, меѓу другото изјави оти е многу тешко да имате двојна позиција во исто време. Исходот во врска со ова прашање, вели, ќе зависи и од бројките во Собранието
На премиерот на техничката влада Талат Џафери е да процени дали ќе побара разрешување на министрите за информатичко општество и администрација и за здравство, Азир Алиу, односно Фатмир Меџити, откако вчера од Алијанса за Албанците излегоа со ваков предлог, а денеска ги соопштија и имињата на кандидатите за кои сметаат дека треба да ги заменат на овие две министерски места.
Ова попладнево го изјави првиот вицепремиер во техничката влада Бојан Маричиќ, прашан за случувањата и раздорот во Алијанса за Албанците и барањата за смена на двајца од тројцата министри што оваа партија ги има во Владата.
Претпоставката на Маричиќ е дека Џафери ќе постапи согласно со тоа што е политичка индикација.
„Знаете дека прашањето за предлагање и разрешување на членови на Владата е во надлежност на премиерот, односно мандатарот. Мандатарот Талат Џафери го предложи составот на Владата, Собранието го поддржа и оттогаш сме членови на Владата, предводени од премиерот Џафери. Ќе видиме во однос на тоа што дошло од Алијанса. Претпоставувам дека премиерот на техничката влада Џафери ќе постапи согласно тоа што е политичка индикација“,
изјави првиот вицепремиер, одговарајќи на новинарско прашања по средбата со пратеникот во германскиот парламент (Бундестагот), Јосип Јуратовиќ.
Во однос на Алијанса за Албанците, Маричиќ рече дека таа е значаен партнер во Владата и оти треба да се чуе нивното мислење и нивните предлози.
Говорејќи во таа насока, тој рече оти е важно кого поддржуваат партиите, бидејќи Владата се составува врз основа на нивната волја.
„Но, ако Алијанса влегла во техничката влада затоа што била дел од мнозинството и ги задржала истите места, тогаш така очекуваме и да се постапи. Доколку Алијанса или дел од Алијанса го промениле мислењето, тоа сепак зависи од внатрепартиските одлуки, ќе треба исто така да се изјаснат“,
рече Маричиќ.
Многу е тешко, додаде тој, да имате двојна позиција во исто време. Исходот во врска со ова прашање, вели, ќе зависи и од бројките во Собранието.
„Но, ние цениме секого, и како политички субјект, зборувам за СДСМ, и јас лично ги ценам сите членови на Владата и сметам дека во зависност од тоа што премиерот ќе го процени, какви се сигналите од Алијанса и какви се ставовите во врска со ова и нормално какви се бројките во Собранието ќе зависи исходот“,
кажа Маричиќ.
Вчера, како што рече првиот вицепремиер, имале долга седница на Владата на која се донеле многу одлуки и во дел од нив учествувале актуелните министри и заменик-министри од Алијанса за Албанците.
„Имаше одредени различни мислења, но ова е влада којашто обединува повеќе партии. Доколку премиерот процени, значи ќе треба него да го прашате, ќе побара нивно разрешување“,
рече Маричиќ.
Алијанса за Албанците попладнево соопшти дека одлучила да постави нови кандидати за министри за здравство и за информатичко општество и администрација на местата на Фатмир Меџити и Азир Алиу, кои исто така како кадри на оваа партија станаа министри во преодната влада.
За министер за здравство се предлага Илир Демири, актуелен директор на Клиничката болница во Тетово, а за министер за информатичко општество и администрација е предложен Наим Бајрами, магистер по политички науки.
„Врз основа на Статутот на партијата, членовите 152, 154, 156 и член 84, Управниот совет на Алијансата за Албанците со 5 гласа од 7, едногласно одлучи дека министер за здравство се предлага познатиот лекар Илир Демири, актуелен директор на Клиничка болница во Тетово, а министер за информатичко општество и администрација се предлага Наим Бајрами, магистер по политички науки“,
се вели во соопштението на Алијанса за Албанците.
Инаку, актуелните министри за информатичко општество и администрација и за здравство од редовите на Алијанса за Албанците, Азир Алиу и Фатмир Меџити, вчера на прес-конференција пред Владата изјавија дека нема да поднесат оставки и изразија уверување дека партијата нема да бара нивно разрешување.
Според нив, Алијанса за Албанците (AA) е единствена, нема крило, има легитимни органи и легитимен претседател Арбен Таравари.
Рекоа дека постои една група во партијата која „за нејзини цели, кои ние навистина не ги знаеме во моментов, се здружи со ДУИ и прави таков притисок за АА да оди заедно со ДУИ на изборите“.
Алиу рече дека на вчерашната владина седница, надвор од сите процедури, биле разрешени двајца директори од редовите на Алијанса за Албанците.
„Третата седница на Владата на РСМ се одвиваше надвор од сите процедури што ги имаме и, за жал, Артан Груби одлучуваше која точка да помине и која да не помине. Сакаме да ве информираме дека Артан Груби, за сите проекти за кои се надлежни МИОА и МЗ едноставно, без да ги чита ги одбиваше, а за жал техничкиот премиер на тоа аминуваше. Од вчера еден дел од групата на АА прават притисок врз директорите, сѐ со цел директорите да бидат на нивна страна. Исто така, денеска на седница на Влада имавме една од точките која беше разрешување на двајца директори од Алијанса. Едната е Бујаре Абази, директор на АД ‘Македонски пошти’ и вториот директор е Газменд Абдија, директор на Агенцијата за странски инвестиции. И двајцата исклучителни активисти на Алијанса за Албанците и ние ова директно го цениме како фрлање масло на огнот од страна на ДУИ, но за жал договорени со двајца наши заменик-министри коишто за жал гласаа за разрешување на овие директори“,
изјави вчера Алиу.
И Алиу и Меџити рекоа дека како министри постигнале одлични резултати и оти ќе се борат до крај за да докажат дека тоа што се случува во Алијанса не е во ред и не е демократски.
Превирањата во Алијанса за Албанците, освен меѓу актуелниот и поранешниот лидер на партијата, Арбен Таравари и Зијадин Села, направија раздор и меѓу министрите од оваа партија.
Алиу и Меџити, за кои се бара разрешување, застанаа зад партискиот лидер Арбен Таравари кој викендов преку објава на Фејсбук го повика Централното претседателство на Алијанса да поддржи заеднички настап на партија со опозициските партии на Албанците.
Министерот за правда Кренар Лога, пак, е на иста линија со поранешниот лидер на Алијанса и актуелниот претседател на Централното собрание на партијата Зијадин Села, кој смета дека партијата треба да настапи самостојно на претстојните избори.
За в сабота претседателот на Централното собрание на Алијанса за Албанците, Зијадин Села, закажа седница на ова партиско тело на кое најави дека ќе се бара одговорност од партискиот лидер Арбен Таравари. Денеска, пак, во дел од медиумите беше објавена информација оти Таравари за утре закажал состанок со делегатите на Централното собрание на Алијанса. Во изјава за МИА, Таравари ја потврдил ваквата информација.
„Утре во 19 часот во Куманово ќе одржам консултативен состанок со делегатите на Собранието на партијата“,
вели лидерот на Алијанса за Албанците во изјавата за државната новинска агенција.