Според вицепремиерот, треба да се разгриничи осудата на тоа што се случило во Сребреница како геноцид, како и дека тоа нема никаква врска, ниту, како што вели, може да значи дека таа дамка во Сребреница може да се фрли врз целиот српски народ или Србија
Mинистерот за надворешни работи Бујар Османи денеска рече дека е изненаден од реакциите по објавата дека Република Северна Македонија е меѓу 17 држави кои ја коспонзорираа резолуцијата. Како што посочи тој, одлуката за коспонзорство ја донел сам и тој како министер му дал инструкција на нашиот амбасадор во ОН да биде коспонзор и да ја поддржи резолуцијата
Не треба и не смее оваа поддршка на осудата на Сребреница да се гледа како чин против Србија и против српскиот народ. Напротив, ние негуваме блиски односи, блиски релации и со Србија и со српскиот народ.
Ова денеска за ТВ Канал 5 го изјави вицепремиерот за европски прашања Бојан Маричиќ, коментирајќи ја објавата на министерот за надворешни работи Бујар Османи пред два дена, дека Република Северна Македонија е меѓу 17 држави кои ја коспонзорираа резолуцијата на Обединетите нации за прогласување на 11 јули за меѓународен ден за сеќавање на геноцидот во Сребреница од 1995 година.
Според него, треба да се разграничи осудата на тоа што се случило во Сребреница како геноцид, како и дека тоа нема никаква врска, ниту, како што вели, може да значи дека таа дамка во Сребреница може да се фрли врз целиот српски народ или Србија.
„Тоа сме должни да го разграничиме сите, затоа што не е коректно кон ниту еден народ да се стигматизира цел народ или држава. Затоа мислам дека не треба и не смее оваа поддршка на осудата на Сребреница да се гледа како чин против Србија и против српскиот народ. Напротив, ние негуваме блиски односи, блиски релации и со Србија и со српскиот народ. Ги цениме нашите традиционално добри односи и сакаме да ги градиме и понатаму“,
рече тој.
Одговорноста за Сребреница, според вицепремиерот, мора да се индивидуализира, а за тоа, рече тој, постојат меѓународните трибунали и таа одговорност треба да биде јасно утврдена, како што додаде, со име и презиме.
Според Маричиќ, ставот на Македонија, како што вели, е многу јасно утврден со декларација на Собранието уште на почетокот на 2010 година.
„Тогаш нашето Собрание едногласно со гласање на сите политички партии ја поддржало резолуцијата на европскиот парламент усвоена за Сребреница во 2009 година, каде Сребреница е осудена како геноцид“,
вели вицепремиерот Маричиќ.
Mинистерот за надворешни работи Бујар Османи денеска рече дека е изненаден од реакциите по објавата дека Република Северна Македонија е меѓу 17 држави кои ја коспонзорираа резолуцијата. Како што посочи тој, одлуката за коспонзорство ја донел сам и тој како министер му дал инструкција на нашиот амбасадор во ОН да биде коспонзор и да ја поддржи резолуцијата.
Според него, не смее да се реагира на оваа тема бидејќи прашањето влегува во делот на негирање на геноцидот, што е строго забрането.
„Не очекував реакции, дури сум малку и шокиран од реакциите на дел од граѓаните кои мислам дека се поттикнати од одредени политички партии. Не смееме да реагираме на оваа тема зашто ова прашање влегува во делот на негирање на геноцидот и тоа е строго забрането. Мислам дека овие реакции и интерпретации се жални бидејќи немам дилема дека кој било граѓанин во Република Северна Македонија нема да го осуди убиството во еден ден на над 8 000 цивили – деца, возрасни, кои биле истребени, иако со одлука на Советот за безбедност била прогласена безбедна зона“,
рече тој.
Тој посочи дека вчера во министерството имал средба со амбасадорката на Република Србија на која јасно ѝ го потврдил ставот дека коспонзорирањето на резолуцијата не е однос кон Србија и кон српскиот народ, туку е однос кон едно злосторство кое е направено и за кое меѓународните судови веќе имаат констатирано дека е геноцид и дека негирањето и глорифицирањето на сторителите е продолжување на геноцидот во друга форма.
Резолуцијата ќе биде претставена на 17 април пред Генералното собрание на ОН, а за неа ќе се гласа на 2 мај годинава.