Според Маричиќ, овој момент е историски за евроинтеграцијата на Северна Македонија и смета дека процесите добиваат на успех и вредност ако ги валоризираме во вистинско време
Вицепремиерот за европски прашања и главен преговарач со Европската Унија, Бојан Маричиќ, за Манифестот на владејачката коалиција смета дека е уште еден повик и можност за обединување и начин да се докаже дека политичките партии имаат иста мисија и цел кога станува збор иднината на државата и граѓаните.
„Манифестот потпишан и поддржан од сите политички партии ќе биде силен доказ дека сите имаме иста мисија и цел кога е во прашање иднината на државата и граѓаните. Со заеднички глас за европската иднина да тргнеме по патот на целосно трансформирање на македонското општество“,
напиша вицепремиерот на Фејсбук.
Според Маричиќ, овој момент е историски за евроинтеграцијата на Северна Македонија и смета дека процесите добиваат на успех и вредност ако ги валоризираме во вистинско време.
„Сега не е време за политички надмудрувања и изговори. Убеден сум дека ќе сведочиме за нов брз напредок кон ЕУ и успех во постигнувањето на врвните стратешки приоритети и национални интереси… Сега е најважно сите да застанат на иста страна и со посветеност и единство да продолжат преговорите со ЕУ, оставајќи ги настрана политичките разлики, да демонстрираат искрена намера за членство во ЕУ.“,
вели Маричиќ.
Инаку, владејачката коалиција објави Манифест во кој ги повикува политичките лидери, со потпишување на документот, да се обврзат на ефикасно водење на преговорите за пристапување во Европската Унија.
ВМРО-ДПМНЕ, откако официјално ќе го добие тој документ, ако воопшто има основа за разгледување, ќе го анализира и ќе излезе со свој став, изјави портпаролот на опозициската партија, Наум Стоилковски.