Сега е време да се покаже на дело кој навистина го сака најдоброто за државата и кој сака С Македонија до 2030 г. да стане членка на Европската Унија, рече во интервју за „Цивил медиа“ вицепремиерот за европски прашања Бојан Маричиќ во пресрет на утрешната собраниска седница за уставни измени
Бегањето од носење државнички одлуки и неучеството во најважниот национален процес единствено го отежнува прогресот на државата и нè оддалечува од европската перспектива, и затоа сега не е време за популизам, а блокадите на опозицијата на државата ѝ носат изолација, неизвесност и оставаат простор за влијанија од трети страни, вели Маричиќ.
„Доколку не стане проактивна опозицијата и не даде поддршка за уставните надополнувања, исходот е јасен, тука застануваме и повторно заглавуваме во чекалната на ЕУ. А тоа не носи добро никому и не треба да биде ова цел на никој, поради било кои причини, а најмалку политички”,
вели Маричиќ.
С Македонија е во фаза кога членството во ЕУ е на дофат и тоа според Маричиќ е шанса која не смее да се пропушти. Затоа, вели, уставните измени мора да се случат до крајот на ноември, за да се обезбеди континуитет на преговорите со Европската Унија.
„Колку подолго сме надвор од процесот, толку полошо за економијата, за целокупната клима во државата и толку повеќе млади ќе ја напуштаат државата. Тоа понатаму ќе ја слабее довербата во институциите и ќе биде закана за стабилноста и просперитетот на државата, а тоа сум сигурен дека никој не го посакува и затоа верувам дека ќе успееме да ги завршиме заеднички обврските кои ги имаме на патот до членството во ЕУ”,
кажа Маричиќ.