Возраста на двете поротнички во Основниот кривичен суд во Скопје се наметна како тема и на судското рочиште за предметот „Титаник“.
И во овој предмет е истиот судечки совет како и во предметите ТНТ, „Талир“, „Монструм“, „Топлик“ и „Тендери“. Но, разликата е во тоа што во „Титаник“ уште од почетокот на судскиот процес има резервни поротници, што значи дека и при исклучување на спорните поротнички судскиот процес ќе продолжи.
Сепак, адвокатите повторно укажуваа на две околности, дека две од поротничките имаат наполнето по 60 години, што според Законот за судови е основа за престанок на мандатот. Дополнитено, потенцираа тие, поротничките воопшто не требале да бидат во судечкиот совет бидејќи имале по 60 години уште пред да почне судењето. Другата околност е тоа што на една од нив на 23 декември ѝ е истечен и мандатот од 4 години.
Судијата Осман Шабани, пак, им посочи дека го прашал претседателот на судот Иван Џолев дали е преземено нешто, а тој му го дал само писмото што ги испратил до Судскиот совет.
„Јас не можам да им речам на поротничките станете и одете, немам таква можност. Претседателот на судот е на потег, не сум јас“, рече судијата.
Дополнително, Шабани рече дека телефонски разговарал и со членови на Судскиот совет.
„Ги прашав дали треба да се примени Законот за судови, тие ми рекоа ‘ќе судите додека не добиете решение’“, рече Шабани.
И покрај приговорите на адвокатите кои траеја речиси еден час, судијата повтори дека тој нема законска можност да направи ништо и го продолжи судењето со повикување на првиот сведок за денешното рочиште.
На денешното рочиште сведочеше член на ВМРО-ДПМНЕ, Ацо С., за донации што ги давал во партијата.
„За дадените донации во партијата од благајникот некогаш добивав каса прими, а за други случаи не се сеќавам“, рече сведокот.
Тој рече и дека некогаш пополнувал и уплатници со сума од 40-60.000 денари.
„Овие уплатници не ги носев во банка, туку ги оставав кај благајникот во општинскиот комитет“, рече сведокот.
Ова беше и единствениот сведок кој зборуваше денеска во судница. Беа повикани повеќе, но се оѕваа само двајца. Меѓутоа, поради приговорите околу поротничките, се изгуби околу еден час, па немаше време за вториот сведок бидејќи Миле Јанакиески, кој е обвинет во предметот, во 12:30 часот има јавна седница во Апелацискиот суд за домашниот притвор во случајот „Шпански скали“, каде што исто така е обвинет.
Следното рочиште за „Титаник“ треба да се одржи на 28 јануари 2020.
Во „Титаник“, покрај Јанакиески, обвинети се поранешниот премиер Никола Груевски кој избега и доби азил во Унгарија, ексгенералниот секретар на Владата Кирил Божиновски, поранешната министерка за внатрешни работи Гордана Јанкулоска, како и Мартин Протуѓер, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.