Потпретседателот на СДСМ вели дека мора да закрепне приватниот сектор за да има пари и за јавниот сектор
Намалувањето на платите во администрацијата и во јавниот сектор би било времена мерка. Ако брзо излеземе од кризата, можеме да направиме поврат на средствата што ќе се скратат во следните месеци, изјави министерот за информатичко општество и администрација и потпретседател на СДСМ, Дамјан Манчевски.
Во гостување на ТВ 21, Манчевски, појаснувајќи за предлог-мерките на СДСМ, рече дека мора да закрепнат економијата и приватниот сектор, за да има пари и за администрацијата. Пожелно е, рече, политичките партии, во екот на оваа криза, да се откажат од парите од годишното финансирање.
„Во услови кога се прашуваме дали ќе имаме средства да исплатиме плати, средства за здравствената заштита и за други неопходни работи, тоа е нешто разумно што можеме да го понудиме како политички партии. Предлогот на СДСМ опфаќа и намалување на платите на функционерите и на членовите на управните одбори. Оние членови во одбори што се вработени нема да земаат приход од членството во одборот. Трета по ред е администрацијата. За граѓаните да можат да платат даноци, мора да ни функционира приватниот сектор. Ако нема приватен сектор, ќе нема пари од каде да се плаќа“,
изјави Манчевски .
Тој рече дека мерката за намалување на платите на функционерите и на администрацијата, сепак, е солидарна.
„Што ако оваа криза трае долго. Ќе бидеме среќни ако оваа криза трае од два до три месеци и ако брзо се вратиме во форма. Да укажам само дека САД прават три сценарија: првото е со криза од шест месеци, второто со 12 месеци и третото е со криза од 18 месеци“,
рече Манчевски.
Потпретседателот на СДСМ потенцира дека изборите се одложени, така што нема потреба ниту една партија да прави профитерство во време на здравствената криза.