Според кандидатот за претседател на Движењето ЗНАМ, државата треба да ѝ објави војна на корупцијата, а тоа, како што кажа, може да се постигне со целосна поддршка на институциите и држење на политичките субјекти што подалеку од нив
Лидерот и кандидат за претседател на државата на Движењето За наша Македонија (ЗНАМ), Максим Димитриевски, чиј изборен карван денеска е во Скопје, изјави дека за него се неприфатливи предлозите на дел од неговите противкандидати за уставни измени со кои изборот на шеф на државата ќе врши во Собранието, како и за бришење на формулацијата „јазикот што го говорат 20 проценти“.
Димитриевски го изнесе ваквиот став на прес-конференција, на која првин упати порака до оние кои, како што рече, во минатото се претставуваа како „зелени“, а денеска се претставуваат како „Европски фронт“.
Нивната политика, според претседателскиот кандидат на Движењето ЗНАМ, е монолитна и моноетничка и има за цел да ја трансформира Македонија од прост во сложен тип држава.
Нагласувајќи дека какви било уставни измени во однос на избор на претседателот на државата во Собранието, а не на непосредни избори за него и за неговата партија се неприфатливи, Димитривски рече дека за ова прашање не се пазареле ниту досега, а тоа нема да го прават ниту во иднина по која било основа и за која било цена.
Говорејќи во оваа насока, претседателскиот кандидат на Движењето ЗНАМ, рече дека овие позиции се содржани во неговата програма од која цитираше дел.
„Евентуални предлози за уставни измени кои би се однесувале на бришење на формулацијата „јазикот којшто го говорат 20 проценти“ и менувањето на сегашниот начин на избор на избор на претседател на Републиката за мене е целосно неприфатлив, бидејќи ги подрива фундаментите на кои почива Охридскиот рамковен договор, за којшто сметам дека целосно е реализиран“,
рече Димитриевски.
Прашан што би издвоил од неговата програма што смета дека реално може да помогне во решавање на проблемите на граѓаните, Димитриевски се осврна на борбата против корупцијата и организираниот криминал, на што ќе се посвети уште во првите 100 дена како претседател ако ја добие поддршката граѓаните.
„Мојата програма се вика ‘Манифест за Македонија’ и има пет принципи и пет основни начела. Основните начела се дадени со конкретни рокови. Едно од најбитните се однесува на тоа дека во првите сто дена од позицијата на претседател на државата ќе се заложам за креирање на државна стратегија за борба против корупцијата и организираниот криминал. Тоа претседателот може да го стори, а е повеќе од потребно е во нашата држава“,
рече Димитриевски.
Според него, државата треба да ѝ објави војна на корупцијата, а тоа, како што кажа, може да се постигне со целосна поддршка на институциите и држење на политичките субјекти што подалеку од нив.
Откако ќе се избориме со корупцијата, рече тој, потоа може да ги решаваме и останатите проблеми во државата. Конечната цел, наведе Димитриевски, е Македонија да биде самоодржлива земја.
„Да бидеме свои на своето, а притоа секако да се насочиме и на евроинтегративниот процес којшто според мене треба да продолжи, но Македонците таму треба да влезат не со свиткан ‘рбет, туку со крената глава, што значи македонски јазик во континуитет, нација, сопствена историја и секако реципроцитет“,
порача кандидатот на Движењето ЗНАМ за претседател на државата, Максим Димитриевски.