„Убедени сме дека треба да се движиме многу побрзо по ова прашање“, изјави францускиот претседател по неформалниот Самит на ЕУ во Гранада, Шпанија, додавајќи дека сепак, засега е „премногу рано и не е донесена никаква одлука“
Францускиот претседател Емануел Макрон вели дека сака побрзо проширување на Европската Унија (ЕУ), но засега земјите членки немаат донесено одлука за тоа.
Тој ова го изјави по неформалниот Самит на лидерите ЕУ во Гранада, Шпанија, на која тема беше и проширувањето на Унијата.
„Убедени сме дека треба да се движиме многу побрзо по ова прашање“,
рече Макрон.
Сепак, засега е „премногу рано и не е донесена никаква одлука“, додаде францускиот претседател.
Онаку, оваа есен, Европската комисија (ЕК) треба да претстави препораки за отворање на пристапните преговори со Украина и Молдавија, кои добија кандидатски статус во јуни 2022 година.
Кандидати за членство во Европскаата Унија се и пет земји од регионот на Западен Балкан, меѓу кои и Северна Македонија.
„Постои се поголем консензус дека се соочуваме со вистинска трансформација на нашата геополитичка визија за Европа. Неколку од нас во ЕУ предложија метод и нова амбиција за проширување“,
рече францускиот претседател, пренесува регионалниот сервис на Радио Слободна Европа.
Кон крајот на август, годинава претседателот на Европскиот совет Шарл Мишел во неговото обраќање на Стратешкиот форум во Блед, Словенија порача дека и ЕУ и земјите кандидати мора да бидат подготвени за проширување на Унијата до 2030 година. Истиот ден (28 август) претседателот на Франција од годишниот состанок со француските амбасадори, пак, порача дека Европската Унија треба да размисли за „Европа со повеќе брзини“ за да се справи со проширувањето. Ставот што тој тогаш го изнесе е дека ЕУ треба да се реформира ако сака да интегрира нови земји и да изгради консензус со повеќе од 30 земји членки.
Двете изјави наидоа на различни толкувања во јавноста и политичкиот спектар во земјава во врска со консензусот внатре во ЕУ околу прашањето за проширување со нови членки.
Инаку, денеска по неформалниот Самит на ЕУ во Гранада, Шпанија, претседателката на Европската комисија, Урсула фон дер Лајен информираше дека лидерите на ЕУ ја реафирмирале посветеноста на проширувањето, но, исто така го потврдиле и ставот дека процесот мора да се заснова на принципот на заслуги.
Таа порача дека и земјите кандидати и Европската Унија (ЕУ) мора да работат напорно за да го задржат моментумот на процесот на проширување кон поголема Унија.
„Нема да има ‘скратени патеки’, нема автоматизам за членство во ЕУ. Тоа мора да е базирано на заслуги. Кога велиме базирано на заслуги, тоа не значи дека само земјите кандидати мора да ги исполнат своите обврски, туку и ние мора да ја завршиме својата домашна задача за да бидеме подготвени, доколу земјите кандидат бидат подготвени за членство, да можеме да ги примиме“,
рече претседателката на ЕК.
Ова е нотирано и во завршната Декларација која беше усвоена на Самитот во Гранада.
Во Декларацијата не се споменува 2030 година како датум за прием на нови членки во Унијата, но, според претседателот на Европскиот совет, Шарл Мишел, овој датум останува како цел за проширувањето, истовремено посочувајќи дека и земјите кандидатки мора да покажат јасен напредок во спроведувањето на реформите.