Прашањето за почеток на пристапни преговори со Северна Македонија и со Албанија било една од темите на разговор меѓу францускиот претседател Емануел Макрон хрватскиот премиер Андреј Пленковиќ во Париз. Макрон инсистира на промена на методологијата за преговори со земјите-кандидатки пред да се донесе одлука за отворање преговори, а Пленковиќ се надева на позитивен сигнал уште пред самитот ЕУ – Западен Балкан во мај во Загреб.
„Сметаме дека европската перспектива за хрватското соседство нема алтернатива и затоа се радуваме што заеднички ќе го пронајдеме решението, било да станува збор за модификација на методолoгијата на преговорите за проширување или други конкретни потези кои Северна Макеоднија и Аlбанија може да ги направат во следниот период. Ние сакаме пред Самитот (на ЕУ и Западен Балкан во мај) во Загреб да се создаде атмосфера, така што оние земји кои имаа резерви да се согласат да продолжи пристапниот процес. Тоа беше суштината на нашиот разговор на оваа тема”, рече Пленковиќ по работниот ручек со Макрон во Елисејската палата.
И изјавата на Макрон беше во афирмативен контекст.
„Ги споделувам вашите напори да постигнете единство на самитот во Загреб во мај и тој да биде успешен за Европа. Франција предложи нова методологија за процесот на проширување да не биде само бирократски процес, туку вистински политички пат напред што може да се забрза и да биде ревирзибилен, кој има услови, но и конкретни придобивки за земјите-кандидати“, рече Макрон.
Франција го блокираше отпочнувањето пристапни преговори со Северна Македонија и покрај согласноста на големо мнозинство земји-членки дека процесот треба да почне и паралелно да се разговара за евентуална промена на методологијата. Хрватска, која од 1 јануари го презеде шестмесечното претседавање со Советот на ЕУ, сака да го одблокира процесот.
Планот на ЕК има за цел одлука во март
Како што веќе објави „360 Степени“, Европската комисија работи на план чија крајна цел е почеток на преговори за членство со Северна Македонија и со Албанија во март годинава. Временската рамка за идните чекори би требало да изгледа вака:
- Европската комисија до крајот на јануари изготвува нацрт-методологија за пристапните преговори и почнува консултации со земјите-членки на ЕУ;
- Европската комисија во февруари објавува скратен извештај за напредокот во реформите во Северна Македонија и во Албанија;
- Советот на Европската унија, односно земјите-членки, кон крајот на март ја усвојуваат новата методологија и носат одлука за почеток на преговори со Скопје и со Тирана;
- во календарот на ЕУ предвиден е состанок на Европскиот совет на 26 и 27 март, кога веќе ќе бидат завршени и локалните избори во Франција, закажани за периодот од 15 до 22 март.
- поврзана вест: Новиот еврокомесар за проширување Вархели на 15 и 16 јануари во Скопје