Вчерашниот втор круг на регионалните избори беше обележан и со исклучително низок од одѕив бидејќи гласаа само 33,7 проценти од гласачите
Партијата на францускиот претседател Емануел Макрон постигна многу лош резултат во вториот круг од регионалните избори во Франција со освоени вкупно седум проценти од гласовите, а малку подобро помина Националниот сојуз на Марин Ле Пен, со 20 проценти, покажуваат првите резултати од регионалните избори.
Најдобар резултат постигна десничарската Републиканска партија, која ја доби довербата од 38 проценти од гласачите, а по неа следуваат социјалистите и зелените со околу 35 проценти, пренесува Франс 24.
Ле Пен на регионалните избори излезе со амбиција да освои повеќе региони, што ќе биде голем поттик за претседателските избори следната година, но нејзините кандидати најверојатно нема да победат во ниту еден од нив.
Таа, според анкетите, имаше најголеми шанси во регионот Прованса-Алпи-Азурен брег, но излезните анкети покажуваат дека нејзиниот кандидат освои 44,2 проценти од гласовите, а претставникот на републиканците 55,8.
Слично заврши и трката во регионот Горна Франција, каде што конзервативецот Ксавиер Бертранд победи убедливо со 52,7 проценти од гласовите, пред кандидатот на Националната алијанса, кој освои 25,9 и кандидатот на левицата со 21,4 проценти од гласовите.
Во најбогатиот и најнаселен регион, Ил де Франс, во кој е и Париз, победи конзервативната Валери Пекрес со 45% од гласовите. Зад неа се кандидатот на Зелените со 32 и претставниците на Националниот сојуз и Република во движење со по 10% гласови.
„Вечерва не освоивме региони, бидејќи кандидатите со помош на против природни сојузи, направија се за да не спречат да им го покажеме на Французите нашиот капацитет да раководиме со регионалната извршна власт“,
изјави синоќа Марин Ле Пен, видно разочарана.
Вчерашниот втор круг на регионалните избори беше обележан и со исклучително низок од одѕив бидејќи гласаа само 33,7 проценти од гласачите.