Францускиот претседател соопшти дека 13 француски државјани биле убиени од палестинските исламисти во нападот врз Израел на 7 октомври
Францускиот претседател Емануел Макрон во своето обраќање до француската нација го повикал Израел да покаже „силен, но праведен“ одговор на нападот на Хамас, истовремено осудувајќи ја „слепата убиствена омраза“ и „апсолутна суровост“ на палестинската милитантна група.
Посочил и дека Израел има право да се брани „со елиминирање на терористичките групи, вклучително и Хамас, со целни дејства, но со зачувување на цивилното население“, додавајќи дека „единствениот одговор на тероризмот е оној што е … . силен но праведен“.
Макрон соопшти дека 13 француски државјани биле убиени од палестинските исламисти во нападот врз Израел на 7 октомври и вети дека ќе стори сé што е можно за да ги врати преостанатите 17 негови сонародници, чија судбина не е позната.
Францускиот претседател во своето обраќање го нарече Хамас терористичка организација која сака уништување на израелскиот народ и додаде дека единствениот начин за решавање на кризата е давање безбедносни гаранции за Израел и создавање палестинска држава.
Во текот на денот, неколку стотици демонстранти во Париз и пркоселе на полициската забрана за пропалестински демонстрации и протестирале против акциите на Израел и за поддршка на Палестинците.
Единиците за одржување на редот употребиле солзавец и водени топови за да ја растераат толпата.
Демонстрантите, кои беа претежно млади луѓе од различно потекло кои ја поддржуваа палестинската кауза, со спреј испишаа „Слобода за Палестина“ на споменикот на Плоштадот „Република“ во источен Париз.
Многумина носеле палестински знамиња и извикуваа „Сите сме Палестинци“.
Изминатата недедела, пак, илјадници луѓе маршираа во Париз во знак на поддршка на Израел, а Ајфеловата кула беше осветлена во боите на израелското знаме.