Претседателот вели дека станува збор за препораки што се договорени пред три години и додава дека нема сомнеж дека членовите во македонскиот дел од Комисијата работат во заштита на македонскиот идентитет
Македонските членови на Заедничката мултидисциплинарна комисија за историски и образовни прашања со Бугарија нема да се согласат за ниеден квазиисториски или квазиполитички аргументи, какви што често доаѓаат од Софија, рече претседателот Стево Пендаровски по отворањето на 55. јубилејна Летна школа на Меѓународниот семинар за македонски јазик, литература и култура при Универзитетот „Св. Кирил и Методиј“.
Пендаровски, прашан за оценка за реакциите во јавноста околу објавените препораки на историската комисија, нагласи дека изминатите месеци по која било шпекулација или полуинформација што доаѓа од Софија во земјава цела нација се крева на нозе и се обидува да објасни што значи тоа.
„Станува збор за препораки што се договорени пред три години, зад кои стои целиот состав на нашиот дел од Комисијата. И ако после вчерашното образложување на сите тие препораки од македонската страна на Комисијата некому не му е јасно дека станува збор за препораки кои со ништо не задираат во македонскиот јазик и идентитет, тогаш за тие луѓе, кои и после ова не разбираат, нема спас“,
изјави Пендаровски.
Тој нагласи дека нема никаков сомнеж во членовите во македонскиот дел од Комисијата, не само денес туку и во изминатите три години откако се поставени на таа позиција, дека работат во заштита на македонскиот идентитет, јазик, име и сè што е во тој контекст.
„Немам сомнеж ниту во наредниот период дека нема да се согласат на некој квазиисториски или квазиполитички аргументи кои доаѓаат често од Софија“,
истакна Пендаровски.
Вчера реагираа и членовите на македонскиот дел од Заедничката мешовита комисија за историски и образовни прашања на, како што рекоа, клеветите, обвинувањата за предавство и бугаризација кои, според нив, се неаргументирани.