Прашан дали може надворешните влијанија да се поврзат со двојното убиство, шефот на државата вели дека досега не видел таков податок
Немам никакви сознанија со кого некогаш се среќавал амбасадорот во Словенија, Горан Милевски, вклучително и со првоосомничениот за двојното убиство Љупчо Палевски – вели претседателот Стево Пендаровски во интервју за „360 степени“ на МРТ 1. Според Уставот и законите, шефот на државата го потпишува указот за назначување амбасадор на предлог на Владата.
„Да бидеме реални, Палевски беше и претседател на некаква помала партија, претпоставувам се среќавал и со новинари и со лидери на политички партии во тој период кога никој од тие негови соговорници не можел да претпостави, дека тој, сега пак претпоставуваме – ќе биде двоен убиец за година-две од тој период. Во предлогот на Владата за Горан Милевски имаше само најдобри квалификации зошто тој треба да биде наш амбасадор во Словенија и јас го прифатив тој предлог. Ако Владата посака да го враќа, мора да ми прати повторно предлог и да биде образложено зошто овој пат бара негово враќање, па како крајна инстанца да одлучам”,
образложи Пендаровски.
Прашањето за средбите на Милевски со Палевски го наметна премиерот Димитар Ковачевски во неодамнешното интервју за „360 степени“. Ковачевски откри дека го прашал и францускиот претседател Емануел Макрон дали знае кого примаат на гости во француската амбасада во Скопје.
Пендаровски вели дека неформално разговарал на оваа тема и со Ковачевски и со францускиот амбасадор Бомбгартнер, и според него, нема контроверзии околу тоа кои луѓе оделе на средби во амбасадата.
„Да бидеме отворени, на македонската јавност тоа не ѝ е работа да го знае, тоа се специфични информации. Кај претходниот фрнацуски амбасадор доаѓаа луѓе кои беа контроверзни од т.н. разузнавачко милје, меѓутоа со овој амбасадор тоа не се случува. Барем јас немам таков податок дека се случувало и дека се случува”,
вели Пендаровски.
На прашањето за надворешни влијанија врз Палевски и луѓето околу него, Пендаровски одговори:
„Во делот на сознанија, значи непотврдени во судски процеси, бидејќи такви нема, првоосомничениот беше поврзан со елементи кои работеа на проруската агенда во Македонија. За жал, според истите сознанија, тој беше поврзан и со некои високи црковни великодостојници во МПЦ“.
Прашан дали може тие влијанија да се поврзат со двојното убиство, Пендаровски вели дека досега не видел таков податок.
„Треба да шпекулирам во рана фаза на случајот, не можам да видам досега од она што е јавно познато како податок. Да оставиме, сепак, судскиот процес да си го направи своето. Многу е битно првоосомничениот да дојде, да го соочите со овие тројца обвинети кои се сега во притвор за да се види дали тие нивни вербални искази кои ја префлраат вината кај него се точни. Само низ таква контрадикција во судската постапка можеме да ја дознаеме вистината за случајот и се разбира, многу странични експерти кои ќе бидат сигурно ангажирани – психијатри, психолози, социолози, бидејќи е неопходно мултидисциплинарно истражување на овој случај кој не е само судски и не е само политички или врзан со некакво параразузанвачко милје, туку е сигурно врзан со некои процеси кои се случувале во главите на тие нелуѓе“,
рече Пендаровски.