Лукашенко смета дека треба да се постигне договор со украинскиот претседател Володимир Зеленски, „бидејќи зад него стои голем дел од украинското општество“
Белорускиот претседател Александар Лукашенко во интервју објавено денеска понуди да биде домаќин на мировните преговори за Украина што би се одржале во Минск и упати покана до неговите колеги Доналд Трамп, Владимир Путин и Володимир Зеленски.
„Кажете му на Трамп дека го чекам овде, заедно со Путин и Зеленски“,
рече Лукашенко во видео интервјуто што му го даде на американскиот блогер Марио Навфал, снимено на 27 февруари, објави официјалната новинска агенција Белта.
Белорусија е главниот сојузник на Русија, а нејзината територија служеше како задна база за московските трупи да започнат офанзива против Украина во 2022 година.
„Ќе седнеме и тивко ќе се договориме. Ако сакате да се договориме“,
продолжи белорускиот претседател, кој е на власт од 1994 година.
Лукашенко смета дека треба да се постигне договор со украинскиот претседател Володимир Зеленски, „бидејќи зад него стои голем дел од украинското општество“.
„Од границата со Белорусија до Киев има само 200 километри. Половина час со авион. Дојдете“,
ги повика тој колегите.
Во интервјуто објавено во средата, Лукашенко ја пофали подготвеноста на Доналд Трамп да стави крај на конфликтот во Украина што е можно поскоро.
„За нас Минск е најдоброто место за преговори. Минск е наш сојузник“,
одговори портпаролот на Кремљ Дмитриј Песков на дневниот брифинг со новинарите, објаснувајќи дека за ова прашање се уште не е „разговарано“ на највисоко ниво.
Белорусија веќе беше домаќин на преговорите во 2014 и 2015 година во кои беа вклучени проруски сепаратисти од источна Украина и Киев, а сите беа посредувани од Москва, Париз и Берлин.
Овие дискусии резултираа со потпишување на таканаречените Мински договори, именувани по главниот град на Белорусија. Договорот предвидуваше прекин на непријателствата и политичка компонента која требаше да доведе до долгорочно решение, но тоа никогаш не се реализираше.
Објавувањето на интервјуто со Александар Лукашенко дојде откако Доналд Трамп во вторникот рече дека добил потврда од Володимир Зеленски дека е подготвен да преговара за „траен мир“ со Русија.
Средбата меѓу Трамп и Зеленски, одржана минатиот петок во Белата куќа, заврши со жестока вербална пресметка, која во понеделникот резултираше со суспензија на американската воена помош за Украина, што е клучно за Киев.
Во вторникот Зеленски јавно ја изрази својата благодарност до Вашингтон, но и рече дека му е жал за инцидентот во Белата куќа. Аналитичарите сметаат дека изјавата може да го отвори патот за продолжување на дијалогот.