Со неселективноста на правдата, според него, ќе се надмине општествената апатија и разочарување особено меѓу младите кои не веруваат дека во оваа држава може да има правда. Многу истражувања, потсети претседателот, потврдуваат дека емиграцијата на нашите сограѓани, во голема мера, не е предизвикана само од егзистенцијални причини, туку и од квалитетот на животот.
Со едноминутен молк за оддавање почит на жртвите од автобуската несреќа во Бугарија, пожарот во модуларната болница во Тетово и сите сограѓани кои ја загубија битката со ковид-19 оваа година, претседателот Стево Пендаровски го почна годишното обраќање во Собранието.
„Исклучително ми е тешко, втора година по ред, да го започнувам моето годишно обраќање во Собранието со оддавање почит на нашите граѓани кои повеќе не се меѓу нас. Серијата ужасни лични трагедии и колективни трауми на нацијата треба конечно да ја разбудат совеста во македонското општество и одговорноста на надлежните институции, затоа што нема ништо повредно од човечкиот живот и ништо понеправедно ако губењето на тој живот е поради човечки фактор, системски пропусти или прекршени правила“,
рече Пендаровски.
Во обраќањето, претседателот се осврна на неколку аспекти, меѓу кои првиот беше владеењето на правото кој го потенцираше како најважен приоритет на државата, независно од нашето темпо на приближување кон ЕУ.
„И покрај одредениот напредок, констатиран во последниот Извештај на Европската комисија, останува нашата стара обврска која неретко не ја почитуваме, реформите да ги имплементираме во пракса до крај“,
рече Пендаровски.
Со законите што ги носиме, посочи претседателот, не смееме да ги привилегираме оние што не го почитуваат поредокот наспроти оние што го почитуваат.
„Посебно разочарува тоа што, за жал, сите релевантни истражувања на јавното мислење го докажуваат растечкото чувство меѓу граѓаните дека во државата владее културата на неказнивост. Единствениот начин да ја вратиме довербата во институциите е да имаме правна завршница во секој случај каде што постои сомневање за сторени кривични дела. Големата автобуска несреќа во која загинаа 45 наши граѓани е само последниот во низата вакви случаи. Доколку овој, како и некои претходни случаи не добијат судска завршница во разумен рок, недовербата на граѓаните само ќе расте. Општество со такви тенденции е плодна почва за појавата на авторитарни и популистички лидери кои наместо квалитетен процес ветуваат ’брза и ефикасна‘ правда“,
порача Пендаровски.
Со неселективноста на правдата, според него, ќе се надмине општествената апатија и разочарување особено меѓу младите кои не веруваат дека во оваа држава може да има правда. Многу истражувања, потсети претседателот, потврдуваат дека емиграцијата на нашите сограѓани, во голема мерка, не е предизвикана само од егзистенцијални причини, туку и од квалитетот на животот.
„Со други зборови, луѓето заминуваат во оние држави каде што има правда, таму каде што и најбогатите и најмоќните одговараат за кршењето на законите, исто како и луѓето што се истуркани на периферијата на животот“,
рече Пендаровски.