„Секоја чест за полицијата на ДПМНЕ и нивната сервилна, селективна и политички мотивирана примена на сила“, коментираат од опозициската Левица, обвинувајќи ја полицијата дека за разлика од овој, во други случаи со леснотија дозволува да исчезнуваат и бегаат лица осомничени за тешки кривични дела, не постапува со слична ревност при брутални насилства, а семејното насилство го релативизира
Oпозициската Левица синоќа во објава на Фејсбук соопшти дека претседателот на Црвената младина, Андреј Куцуловски, кој вчера попладне беше уапсен, е пуштен од полициска станица со изречена казна од 550 евра за поттикнување насилство и омраза поради истакнување на палестинското знаме за време на вчерашниот ракометен натпревар на кадетите меѓу Македонија и Израел, кој се одржа во салата „Јане Сандански“ во Скопје.
„За овој ‘прекршок’ беше мобилизирана толпа полициски службеници кои приведоа млад човек кој впрочем не пружи никаков отпор, ниту пак направи било каков инцидент. Со лисици, како да се работи за опасен криминалец, беше спроведен во станица, без притоа да му се соопшти основот за лишување од слобода. Секоја чест за полицијата на ДПМНЕ и нивната сервилна, селективна и политички мотивирана примена на сила“,
велат од Левица.
Партијата обвини дека, од друга страна, полицијата со леснотија дозволува да исчезнуваат и бегаат лица осомничени за тешки кривични дела, не постапува со слична ревност при брутални насилства, а семејното насилство го релативизира и го остава без соодветен одговор.
„Државата казнува солидарност, а премолчува насилство! Ако нешто јасно се виде од овој случај, тоа е бруталноста со која системот се однесува кон оние што не се покоруваат“,
додаваат од опозициската партија.
Претседателот на младинското движење на Левица, Андреј Куцуловски, вчера попладне беше приведен откако за време на ракометен натпревар на кадетите меѓу Македонија и Израел, кој се одржа во спортската сала „Јане Сандански“ во Скопје, го истакнал палестинското знаме.
Од МВР информираа дека Куцуловски е приведен за сторен прекршок по член 3 од Законот за спречување насилство и недостојно однесување на спортски натпревари.