Од Лекарската комора посочуваат дека станува збор за манипулативни и лажни реклами за т.н. медицински производи, препарати и методи со непроверено потекло, состав или производство, а поголем број доктори кои се жртви на вакви злоупотреби до надлежните институции веќе имаат поднесено кривични пријави со соодветни докази
Основното јавно обвинителство и Министерството за внатрешни работи итно да постапуваат и да ја спречат злоупотребата на професионалниот интергитет и авторитет на лекарите во функција на лажно рекламирање непроверени форми на медицински препарати, лекови, додатоци во исхрана, методи или помошни средства за лекување, кои се сè поприсутни на интернет-порталите и на социјалните мрежи, побараа од Лекарската комора на Македонија која е професионално здружение на сите доктори по медицина.
Оттаму информираат дека до Комората зачестено стигнувале поплаки од доктори кои се жалеле дека случајно откриваат дека нивното име и фотографија се користат за промоција и продажба на одредени производи без нивна согласност или знаење.
„Оваа употреба на нивниот професионален интегритет има сериозни негативни последици, како за нивната репутација како медицински професионалци така и за пациентите кои може да станат жртви на оваа измама“,
се наведува во денешното соопштение од Лекарската комора.
Од Лекарската комора посочуваат дека станува збор за манипулативни и лажни реклами за т.н. медицински производи, препарати и методи со непроверено потекло, состав или производство.
„Во рекламите се пласираат измислени изјави или интервјуа со вистински лекари и се објавуваат нивни фотографии, без лекарите да дадат соодветна согласност за користење на нивното име и професионален интегритет за рекламирање на овие препарати, поради што ова може да се смета за груба злоупотреба на личните податоци и лажно рекламирање за остварување на материјална корист. Штетата е уште поголема кога поради лажното рекламирање на препаратите пациентите може да добијат впечаток дека се работи за некои видови на чудотворни лекови, а со тоа да ја занемарат редовната терапија и да предизвикаат сериозна штета по своето здравје“,
се додава во соопштението.
Од Лекарската комора велат дека докторите кои се жртви на вакви злоупотреби задолжително да пријават во Министерството за внатрешни работи и кога е можно да ги предупредат пациентите за овие лажни реклами.
Во соопштението се додава дека до надлежните институции поголем број лекари веќе имаат поднесено кривични пријави со соодветни докази.
Од Комората информираат дека и досега јавно реагираат и предупредуваат преку соопштенија за последиците, но сè уште немаат информација за донесени јавнообвинителски одлуки за овие предмети.
„Ги осудуваме сите вакви злоупотреби и бараме поажурно постапување за итно расветлување на случаите и соодветно санкционирање на сторителите. На овој начин ќе се заштитат и докторите и пациентите, ќе се превенира генерирање на нови случаи на злоупотреба, но и ќе се спречи можноста за предизвикување на штета по здравјето на граѓаните“,
додаваат од Лекарската комора.