Доктори сè почесто во медиумите објавуваат написи и коментари, даваат изјави и интервјуа, а нивните ставови не се базирани на медицински докази или на лично искуство и директна работа со пациенти заразени со ковид-19, реагираат од Лекарската комора.
Со ова, велат оттаму, тие целосно го девалвираат трудот на здравствените работници, кои директно се вклучени во лекување на заболените пациенти. Дополнително, осудата од Лекарската комора е и затоа што на ваков начин влијаат на пациентите и ја рушат нивната доверба.
„Индивидуалните, неаргументирани тврдења за ковид-19 на доктори и здравствените работници, населението може да ги сфати сериозно, а со употребата на термини како ’грешки во лекување‘ се нанесува директна штета на угледот на целата лекарска фела и се создава страв и недоверба кај граѓаните во здравствениот систем и здравствените работници. Ваквите ставови можат да влијаат врз одлуката на пациентите да не побараат медицинска помош и со тоа директно да го загрозат своето здравје, но и да поттикнат вербални и физички напади врз здравствените работници“,
пишува во реакцијата на Лекарската комора.
Оттаму апелираат до оние што излегуваат и зборуваат за коронавирусот во јавност, тоа да го прават со сериозен и стручен пристап, да не шират лажни информации и доктрини, туку нивните настапи да се со аргументи и докази.
Ако некој, пак, има сознанија дека во некоја здравствена установа не се постапува согласно протоколите и етичките начела, Лекарската комора апелира тоа да се пријави кај нив нив, во Државниот санитарен и здравствен инспекторат и во сите останати институции.