Лекарите кои доцна во текот на ноќта ја извршија втората успешна трансплантација на срце, се поклонија на девојката чие семејство одлучи да ги донира нејзините органи. Трансплантацијата беше направена на Клиниката за кардиохирургија, а фотографијата по успешната операција ја сподели министерот за здравство Венко Филипче.
„Историска фотографија, докторите и се поклонуваат на младата девојка чие семејство одлучи да ги донира нејзините органи. Нејзиниот млад живот трагично згасна, но нејзиното срце спаси друг млад живот. Нема зборови со кои може да се искаже благодарноста кон семејство. Нема зборови со кои може да се опише алтруизмот и големината на чинот на органодарителство. Во моменти на длабока тага да се донесе одлука за донирање на органите на блиските е дефиниција за хуманост“
напиша Филипче.
Операцијата траела до 3 часот и 30 минути утринава, кога почнало да чука срцето кај 27 годишното момче. Ова е втора успешна трансплантација на срце од починат донор која се изведува во Македонија на Клиниката за кардиохирургија.