Најмалку што можат да направат парите за таа кампања и парите за фејсбук-рекламите на Бојан Маричиќ да завршат кај жртвите на луѓето од Онкологија, кај луѓето кои зеле кредити и се задолжиле за да ги лекуваат своите најблиски. Најмалку што треба да направи Бојан Маричиќ е веднаш да се откаже од таа кампања затоа што со вакво здравство и скандали, не си Европа, истакна Лефков
Пратеничката група на ВМРО-ДПМНЕ и коалицијата денеска во Собранието поднесе иницијатива со собрани 20 потписи во кои побара да продолжи седницата за уставните измени, информира пратеникот и член на ИК на ВМРО-ДПМНЕ, Миле Лефков во вечерашното гостување во емисијата „За или против“ на телевизија Алфа.
„После поминати 14 месеци целата јавност е свесна за тоа како се манипулираше дека ќе биде обезбедено мнозинство, па им фалеле двајца, тројца, четворица, пет, шест пратеници, тоа дополнително ги вознемируваше граѓаните и наместо да разговараме за реални проблеми ние разговаравме за работи кои не можат да се случат затоа што тие кои преземале обврска тоа да го спроведат не се консултирале со опозицијата и не разговарале со никого, впрочем најверојатно работеле само во свои интереси, а не во интереси на државата. На 18-ти август јавноста виде како сите 44 пратеници од коалицијата заедно застанавме и побаравме веднаш точката да биде ставена на гласање по обраќањето од нашата пратеничка група“,
истакна Лефков.
Според него, спикерот Талат Џафери се одлучил да ја одложи и тоа е противделовнички затоа што промената на Уставот е регулирана со посебна глава.
„Многу е важно расправата да заврши со заклучок затоа што тоа го заслужуваат граѓаните, државата и Уставот како највисок законодавен акт во државата. Талат Џафери се повика на акт на неговото неприкосновено право за своеволно толкување на Деловникот и денеска на собраниска седница го истолкува само како што тој знае да го истолкува. Денеска пратеничката група на ВМРО-ДПМНЕ и коалицијата постапи и поднесе иницијатива со собрани 20 потписи во кои побара седницата да продолжи“,
рече Лефков.
Тој оцени дека власта треба да се откаже од кампањата „Ние сме Европа“ и истакна дека парите треба да завршат кај жртвите на луѓето од Онкологија.
„Тоа што се одлучија европските пари да ги трошат за кампања ‘Ние сме Европа’ покажаа дека во Македонија навистина имаат сериозни проблеми, па сега им требаат европските средства и пари за да го билдаат својот углед. Погледнете ги објавите на Бојан Маричиќ кој себепромоцијата ја плаќа со пари од Европската Унија, еден дел од постовите се спонзорирани од европски пари. Најмалку што можат да направат е парите за таа кампања и парите за фејсбук-рекламите на Бојан Маричиќ да завршат кај жртвите на луѓето од Онкологија, кај луѓето кои зеле кредити и се задолжиле за да ги лекуваат своите најблиски. Најмалку што треба да направи Бојан Маричиќ е веднаш да се откаже од таа кампања затоа што со вакво здравство и скандали, не си Европа“,
потенцира Лефков.