Лавров предложи претседателството на Г-20 да издаде необврзувачка изјава доколку на состанокот не се постигне консензус
Русија ќе ја блокира конечната декларација од самитот на Г-20 овој месец доколку таа не ја одразува позицијата на Москва за Украина и другите кризи оставајќи им на учесниците можност да дадат необврзувачка или делумна изјава, изјави рускиот министер за надворешни работи Сергеј Лавров. Лавров треба да ја претставува Русија на состанокот на Г-20, водечките индустријализирани и земји во развој, што ќе се одржи од 9 до 10 септември во Њу Делхи.
Не е познато дали рускиот претседател Владимир Путин отпатувал во странство откако Меѓународниот кривичен суд издаде налог за негово апсење во март под сомнение за воени злосторства во Украина.
„Нема да има општа декларација во име на сите членки ако (тоа) не ја одразува нашата гледна точка“,
им рече Лавров на студентите од престижниот московски државен институт за меѓународни односи.
Кремљ ја гледа украинската војна, која започна со руската инвазија во февруари 2022 година, како егзистенцијална битка со „арогантниот“ Запад. Путин тврди дека Западот сака да ја уништи Русија и да ја преземе контролата врз нејзините огромни природни ресурси.
„Секој нека зборува за себе“
Западот ги негира таквите намери, но сака Украина да ја победи Русија на бојното поле. Западните земји воведоа серија економски санкции кон Русија како одговор на инвазијата, која Русија ја нарекува „специјална воена операција“. Други водечки сили како Кина, Индија и Бразил повикаа на мир, но го задржаа правото сами да ги одредуваат своите односи со Москва. Кина го обвини Западот дека ја поттикнува војната со вооружување на Украина.
Лавров рече дека Западот го покренал прашањето за Украина на состаноците пред самитот, но дека Русија рекла дека прашањето е „затворено“ за неа. Шефот на руската дипломатија го обвини Западот дека ги поткопува меѓународните институции со наметнување на сопствена агенда. Лавров предложи претседателството на Г20 да издаде необврзувачка изјава доколку на состанокот не се постигне консензус.
„Друга опција е да се донесе документ кој ќе се фокусира на конкретни одлуки во сферата на надлежноста на Г20, а за останатото секој нека зборува во свое име“,
рече Лавров.