Минатата недела трите земји спроведоа заеднички поморски вежби во кои учествуваше американски носач на авиони, што беше демонстрација на сојузничката сила пред Северна Кореја
Рускиот министер за надворешни работи Сергеј Лавров синоќа ги обвини САД, Јужна Кореја и Јапонија дека се подготвуваат за војна со Северна Кореја, јавува Асошиејтед прес.
Лавров на конференцијата на ОН рече дека новиот воен блок што го собраа САД ги зајакнува воените активности и спроведува големи вежби.
„Реториката на Јужна Кореја стана уште понепријателска кон Пјонгјанг. Остри пораки доаѓаат и од Јапонија и сериозно се зборува за воспоставување инфраструктура на НАТО со помош на САД“,
тврди Лавров.
Лавров рече дека целта на тој воен блок е јасна.
„Тие се подготвуваат за војна со Северна Кореја“,
убеден е Лавров.
Шефот на руската дипломатија рече дека САД, Јужна Кореја и Јапонија разговарале и за развојот на меѓусебната соработка.
„Многу е смешно како тоа го формулираа, но јасно е дека се работи за соработка поврзана со нуклеарно оружје“,
рече тој.
Минатата недела трите земји спроведоа заеднички поморски вежби во кои учествуваше американски носач на авиони, што беше демонстрација на сојузничката сила пред Северна Кореја.
Путин има намера да го посети Пјонгјанг
Во последните неколку недели севернокорејскиот лидер Ким Џонг-ун нареди цела серија тестови на различно оружје, но и се закани на Јужна Кореја и САД, со што ги зголеми тензиите во регионот. Дипломатите од САД, Јапонија и Јужна Кореја треба да се сретнат во Сеул за да разговараат за односите со Пјонгјанг.
Од друга страна, Лавров рече дека односите меѓу Русија и Северна Кореја „се развиваат активно и квалитетно“.
„Гледаме дека Северна Кореја се обидува да биде независна од влијанието на другите“,
рече тој.
Ким Џонг-ун е еден од ретките светски лидери кои отворено ја поддржуваат војната на рускиот претседател Владимир Путин против Украина. Тој активно ги зајакна врските со Русија во обид да излезе од дипломатската изолација и да ја зајакне својата позиција, а во исто време влегува во сè поголем конфликт со Вашингтон, Сеул и Токио.
Рускиот претседател Владимир Путин изјави дека има намера да го посети Пјонгјанг во септември оваа година.
„Некои веруваат дека се господари на универзумот“
Лавров ја спореди неодамнешната најава на Ким Џонг-ун дека Северна Кореја нема повторно да се обедини со Јужна Кореја со изјавата на израелскиот премиер Бенјамин Нетанјаху дека нема да има палестинска држава по војната меѓу Израел и Хамас.
„Страшно е кога наместо единство имаме работи што не разделуваат. Сепак, ова е ссистемски процес во многу региони, а за овој тренд најмногу придонесуваат оние кои веруваат дека се господари на универзумот“,
тврди Лавров.
Без да ги именува САД и поранешните западни колонијални сили, тој рече дека земјите што на другите им наметнале како да се живее, половина милениум го игнорираат фактот дека огромното мнозинство од поранешните колонии сега се независни држави.
На поранешните колонијални држави не им треба Западот, смета Лавров, мислејќи на економскиот блок на економии во развој БРИКС, кој ги вклучува Бразил, Русија, Индија, Кина и Јужна Африка. Членовите на БРИКС, исто така, ги поканија Иран, Саудиска Арабија, Обединетите Арапски Емирати, Египет и Етиопија да се приклучат.
Лавров тврди дека „поранешните колонијални сили мора да се соочат со реалноста во денешниот свет“.
„Не треба да мислите дека сте толку силни само затоа што имате долар“,
рече тој.